amalinks wokungena

Breaking News

Amalunga eZanu PF Asexotsha Awebandla leCitizens Coalition for Change Esililweni Sika Moreblessing Ali


Umsekeli webandla leCCC uNkosazana Moreblessing Ali othunjwe mhlaka 24 ngoNkwenkwezi.
Umsekeli webandla leCCC uNkosazana Moreblessing Ali othunjwe mhlaka 24 ngoNkwenkwezi.

Kuvuke umsindo namuhla eNyatsime lapho abalandeli bebandla leZanu PF abavimbe abebandla leCitizens Coalition for Change ukuba bekhalele umdeni kaNkosikazi Moreblessing Ali, otholakale ebulewe isidumbu saphoselwa emgodini wamanzi kuleyondawo.

UMnu. Job Sikhala, okubandla leCCC, uthi ukhansila waleyondawo ubavimbe esithi bebegqoke izembatho zebandla leli njalo bakhuluma kubi ngokubulawa kuka Ali.

Kodwa obona ngokwethulwa kwemibiko kubandla leZanu PF, uMnu. Tafadzwa Mugwadi, uthi kuyamangalisa okwenziwa libandla leCCC elikhankasa ngesidumbu sikamuyi.

Bathithibele abantu eZimbabwe kulandela ukubulawa kwabasekeli bebandla eliphikisayo eleCCC, ekhokhelwa nguMnu. Nelson Chamisa.

Isidumbu sikaNkosikazi Ali sitholakale izolo siqunywagunywe saphosela emgodini wamanzi eNyatsime. Kuthi koBulawayo kusanda kubulawa uMnu. Langelihle Dube owaganyulwa ngamabhemba emzini wakhe.

Ababili laba bebesaziwa kakhulu ezigabeni zabo njengabantu abafuna kube lenguquko kwezombusazwe eZimbabwe. Kucatshangelwa ukuba babulewe ngabalandeli bebandla leZanu PF. Kodwa isikhulumeli samapholisa, uAssistant Commissioner Paul Nyathi, uthi uAli kucatshangelwa ukuba wabulawa nguPius Jamba, owayethandana laye, kuthi-ke uDube ubulewe yizigebengu.

UDube ubekwa namuhla. Umdeni kaAli uthi isidumbu esitholakale izolo eNyatsime ngesika Nkosikazi Ali. Olwela ilungelo likazulu uMnu. Effie Dlela Ncube, uthi kuyethusa okwehlele ababili laba ngesikhathi kulungiselele ukhetho oluzakwenziwa ngomnyaka ozayo.

Lokhu kusekelwa nguMnu. Mbuso Fuzwayo, okhokhela inhlanganiso yeIbhetshu likazulu, othi ibandla leZanu PF liyaziwa ngokubulala abantu.

Banengi ababambe owangaphansi ngezehlakalo lezi. Omunye wabo nguMnu. Sipho Ngulube, olandela ezombusazwe.

Umsekele wesikhulumeli webandla leCCC, uMnu. Felix Magalela Mafa, uthi kuyethusa okwehlele uNkosikazi Ali loDube. UMafa uthi akumelanga lokhu kwenzakale elizweni.

UMnu. Simba Mavaza, okubandla leZanu PF, uthi amapholisa akhuluma iqiniso ngakho-ke abezombangazwe basenga ezimithiyo.

Banengi abantu abathunjwa ngabacatshangelwa ukuba badlelana lebandla elibusayo kusukela ngomnyaka ka1983. Abantu abafika inkulungwane ezingamatshumi amabili – 20,000 babulawa yiGukurahundi eMatabeleland leNkabazwe kusukela ngomnyaka ka1983. Abanye baphoselwa emigodini bephila bafela khona.

XS
SM
MD
LG