amalinks wokungena

Breaking News

Kulungiselelwa Imidlalo kaMarvellous Nakamba Abanye Bakhonona Ngokusungulwa Kohlelo Lolu eHarare


Antony Nakamba of the Marvellous Nakamba Foundation

Abenhlanganiso yeMarvelous Nakamba Foundation bathi umkhosi wokwazisa uzulu ngemidlalo yeMarvelous Nakamba Foundation Under - 17 Invitational Tournament uqhutshelwe esigodlweni iHarare ngoba bedinga abangasebenzisana labo babancedise ngosekelo lwemali.

Bakhona abalandeli bomdlalo wenguqu abakade bekhonona besithi kungani umkhosi wokwazisa uzulu ngomncintiswano weMarvelous Nakamba Foundation Under - 17 Invitational Tournament uqhutshelwe esigodlweni iHarare ngoLwesine loba nje limidlalo yona izadlalelwa edolobheni lakoBulawayo.

Umgcinisihlalo weMarvelous Nakamba Foundation, uAntony Nakamba uchaze ukuba akulanto embi abakade beyihlose ngokwenza njalo.

“Isizatho sethu esokuqhuba loluhlelo esigodlweni iHarare yikuba besidinga amankampani amanengi kanye labamela amanye amazwe kuleli abatholakala khonale ngoba sidinga abangasixhasa besebenzisane lathi.

Kwelizayo mhlawumbe singaya eVictoria Falls kumbe kwezinye indawo. Yiso nje kuphela isizatho esokuba siluqhubele eHarare loluhlelo, akula okunengi,” kutsho uNakamba.

Umncintiswano we Marvelous Nakamba bekumele uqale ukudlalwa nyakenye kodwa usuke waphazamiswa yikumemetheka komkhuhlane weCovid.

Usuzaqhutshwa mhla zingamatshumi amabili lanhlanu lamhla zingamatshumi amabili lesithupha enkundleni yeWhite City koBulawayo.

Umqondisi walumncintiswano uNduduzo Sibanda uphawule kabanzi ngokuzakwenzakala ngempelaviki ezayo.

“Amaqembu ayithoba minwe mbili azadlala ngoMgqibelo azakube esezibayeni ezimbili. NgeSonto amaqembu amabili azabe ekhokhele kuzibaya zawo azadibana kusigaba se semi-final kuthi azanqoba lapho abesedibana kufinal,” kutsho uSibanda.

Amaqembu azaphatheka kumncintiswano weMarvelous Nakamba Foundation Under - 17 Tournament ngabalisa eleHighlanders, eleDynamos, eleNjube Spurs, eleHwange Dynamo, eleAlbun Academy, eleBulawayo City, eleAjax Hotspurs kanye leleChicken Inn.

Umqondisi weqembu leAjax Hotspurs uSiphambaniso Dube uthi ukuphatheka kulumncintiswano kulakho ukuvulela abadlali amathuba amahle.

“Lithuba elihle kakhulu njalo thina njenge Ajax Hotspurs silamukele ngezandla zombili. Siyambonga uMarvelous Nakamba ngoba ubacabangile abasakhulayo, wabakhupha emigwaqweni, wabazama ngokuthi babonwe ngamaqembu amakhulu bedlala kulumncintiswano,” kutsho uDube.

UMarvelous Nakamba udlalela iqembu leAston Villa elaseNgilandi njalo uke wadlala emazweni abalisa eleFrance, eNetherlands, kanye laseBelgium.

Kukhangelelwe ukuba kuzakuba labavela kwamanye amazwe abazodinga abadlali kulumncintiswano.

Facebook Forum

XS
SM
MD
LG