amalinks wokungena

Breaking News

Ncedani Ngengwalo Zezifundo ze ‘O’ Level Zokunikeza uMsaraure Osefundisa Izibotshwa e-Chikurubi Maximum Prison - ARTUZ


U-Obert Masaraure umkhokheli wenhlanganiso yababalisi eyeAmalgamated Rural Teachers Union of Zimbabwe

Abe ARTUZ bathi uMasaraure njengombalisi, ufuna ukwenza lokho akwazi ngcono kungakho becela uzulu ukuba asize ngalezingwalo zimsize kuhlelo lokufundisa izibotshwa eChikurubi Maximum Prison.

Abenhlanganiso elwela amalungelo ababalisi eye Amalgamated Rural Teachers Union of Zimbabwe, bacela uncedo lwamabhuku asetshenziswa ezifundweni, ama textbooks ezifundo zeOrdinary Level ukuze zisiwe ejele ele Chikurubi Maximum Prison, lapho we ARTUZ umkhokheli avalelwe khona njalo aseqale khona inhlelo zokufundisa ezinye izibotshwa.

Lokhu kuphuma kusicelo esilotshwe ngokhokhela uhlangothi olubona ngezemfundo kuARTUZ, umnumzana Gerald Tavengwa.

Ulandisa labanzi ngalesi sicelo sabo, umnumzana Tavengwa.

“Lokhu kuza ngemva kokubotshwa komkhokheli weARTUZ esetheswa icala elingaqedakaliyo. Kungakho njengohlangothi kanye laye umkhokheli wethu, sikubona kufanele ukuba sivuselele izikolo khona eChikurubi Maximum Prison.”

U-Tavengwa uqhubeke ethi abaceli ncedo lwengwalo kuphela.

“Ingwalo ziyafunakala, layiloba yiphi impahla esetshenziswa kwezokufundisa izifundo zonke nje zesibanga se “ Ordinary Level ”. Siyalubonga lolosizo esizoluthola luvelela kuzulu.”

Umnumzana Tafadzwa Chigandiwa, intathelizindaba esebenza izimele uthi kuyancomeka okwenziwa ngabe ARTUZ loMasaraure, ukufuna ukuvuselela ezemfundo eChikurubi Maximum Prison.

“Kuyinto enhle nxa efuna ukufundisa abantu, kabafundise. Ayisiye wonke umuntu ongafuniyo ukufunda, lalabo abasentolongweni khonangale bayafuna ukufunda, ngoba labo lilungelo labo. Bayabe bekhangelele ukuthi lelo lungelo lenziwe ngendlela, siyamkhuthaza kulento asefuna ukuthi ayiqalise khonangale.”

Umnumzana Nkosinathi Ncube, isakhamuzi sakoBulawayo, laye upha umbono wakhe phezu kwaloludaba.

“Okwenziwa ngubaba uMasaraure, kuyancomeka kakhulu, ukuthi ngapha ebotshiwe esejele eChikurubi, athathe lelothuba enze lento ayijwayeleyo njalo ayithandayo, eyokufundisa, efundisa izibotshwa njalo ebona ukuthi angamotshi lelothuba, ukuthi ehlale nje emelele ukuthi aze aphume. Hayi kuhle kakhulu, kufuneka nje lathi njengabazali, sesame lokho esikukwanisayo, simncedise kumbe ngamabhuku loba whatever akufunayo.”

Lumsakazo awusanelisanga ukukhulumisana leziphathamandla enhlangothini ezigoqela olweZimbabwe Prisons and Correctional Services ( ZPCS ) kanye labogatsha lwezemfundo yePrimary le Secondary ukuzwa imibono yabo phezu kwaloludaba lokuvuselelwa kohlangothi lwezemfundo eChikurubi Maximum Prison, ngoba incingo zabo bezingasatshelwa kanye lemibiko ethunyelwe enkundleni eyeWhatsapp.

Abe ARTUZ bathi uMasaraure njengombalisi, ufuna ukwenza lokho akwazi ngcono kungakho becela uzulu ukuba asize ngalezingwalo zimsize kuhlelo lokufundisa izibotshwa eChikurubi Maximum Prison.

Bathi uMasaraure wenza lokhu ngoba engumuntu okholelwa ekuthini imfundo lilungelo lomuntu wonke kungakhathalekile ukuba ukuphi kwendawo.

U-Masaure ubotshwe ngolweSibili weviki ephelileyo esetheswa umlandu wokubulala kusehlakalo esenzakala ngomnyaka ka 2016 lapho omunye wabasakhulayo owayekhankasela umbuso kazulu ngaleso sikhathi umnumzana Roy Issa ebikwa wawa evelela ku 7th floor e Jameson Hotel ngesikhathi elabanye bakhe okugoqela yena uMasaraure, ebikwa wayedakiwe. Kodwa uMasaraure uyalilandula lelicala esithi yena wayengekho kuleyondawo ngaleso sikhathi okwakhe yikuthi wavumela abangene bakhe ukuthi basebenzise igumbi lakhe kuphela.

U-Masaraure ubikwa ebotshwa ngesikhathi eye ukuyazibika enkambeni yamapholisa njengalokho amele akwenze kulandela izinqumo azibekelwayo ngumthethwandaba kaMantshi ngesikhathi enikwa imvumo yokuhlawulela i-Bail.

Facebook Forum

XS
SM
MD
LG