amalinks wokungena

Breaking News

Umqeqetshi Weqembu leBosso Uthi Benza Kahle Abadlali Asebalolonge Okwamaviki Amabili


Abadlali beqembu lenguqu eleHighlanders Football Club

Umqeqetshi omutsha oweqembu lomdlalo wenguqu eleHighlanders uBrito uthi umdlalo wabo wangeSonto leqembu leBlack Rhinos uzakuba ngumhloliso owomsebenzi wamaviki amabili ezihambe esidukwini.

UBrito uthi asekubone kubadlali bakhe kumaviki amabili esebenza labo kumupha ithemba elokuba leliqembu lizatshaya eziwayo kuhlandla lesibili elemidlalo eyeligi.

“Ngiyathokoza kakhulu ngengikubonileyo lalokho esikwenzileyo. Sisebenze kanzima kumaviki amabili lawa sizama ukulungisa iqembu. Alikabi esimeni engisifunayo kodwa ngokubona kwami siqhuba kuhle. Akulamuntu ongabumba iqembu ngamaviki amabili kodwa nxa abafana bengaqhubekela phambili besenza njengalokhu engikubonileyo sizabajabulisa abalandeli beqembu.”

UBrito uthe umdlalo wabo leqembu leBlack Rhinos yiwo ozambonisa ukuba abadlali bakhe bengawumela yini umsindo ngoba kulomehluko omkhulu phakathi kokuzilolonga kanye lokuncintisana lamanye amaqembu.

Umsekeli kakaputeni weqembu leHighlanders uNqobizitha Masuku uthi kunengi asebekufunde kuBrito lomsekeli wakhe uJoao Martins Leao Torres.

“Khona ngingathi kuyajabulisa njalo kumnandi kakhulu. Ngabantu abathanda ukuba sikholise kodwa siqakathekise umsebenzi wethu. Basifundisa ngezinye indlela lathi ezinye ebesingazazi njalo kunengi abakubisileyo kodwa abakuqakathekisayo yikuthi sibambane sibe yimuli ukuze sinqobe.”

Kweminye imidlalo eyeviki yetshumi lathoba minwe embili iqembu leCranborne Bullets lizadlala lele Chicken Inn ngaseSakubva, iqembu leBulawayo City lizemukela eleNgezi Platinum Stars ngaseBarbourfields, iqembu leYadah lizadibana leleDynamos ngaseNational Sport Stadium.

Yonke limidlalo izadlalwa ngoMgqibelo kuthi eyangeSonto izadlalwa ngokulandelayo; iqembu leTenax lizemukela eleFC Platinum ngaseSakubva, iqembu leCaps United lizatshayana leleZPC Kariba ngaseNational Sports Stadium, iqembu le Whawha lizangqikilana leleManica Diamonds ngaseAscot kuthi iqembu leTriangle lizadibana leleBulawayo Chiefs ngaseGibbo.

Kolunye udaba olumayelana lomdlalo wenguqu, kusasa amaqembu ayithobaminwe mbili awamajaha aleminyaka engaphansi kwelitshumi lesikhombisa azabe ethe gwaqa enkundleni yeWhite City kumncintiswano wakuqala oweMarvelous Nakamba Foundation Under17 Invitational Tournament.

Umqondisi walimidlalo uNduduzo Sibanda uthi, “Lingabe litshonanjani. Sithi silazise njengeMarvelous Nakamba tournament directorate ukuthi kusasa ngoMgqibelo ziyangqikilana kumdlalo weSuper 8. Amaqembu azaqala ukudlala ngehola lethobaminwe mbili ekuseni atshone engqikilana.”

Kusibaya sikaGroup A kulamaqembu abalisa eleHighlanders, eleNjube Spurs, eleDynamos kanye leleMajesa Academy.

Kusibaya sikaGroup B kuleqembu leAjax Hotspurs, eleChicken Inn, eleBulawayo City kanye leleHwange Dynamo.

Imidlalo yesibaya sikaGroup A izadlalelwa phakathi enkundleni yeWhite City kuthi eyesibaya sikaGroup B izadlalelwa kuB Arena.

Amaqembu azaphutsha esendaweni ezimbili eziphezu kwengalane yemiklomelo yiwo azadlulela kusigaba sesemi – final kuthi azanqoba lapho adibane kufinal ngeSonto.

Facebook Forum

XS
SM
MD
LG