WASHINGTON DC - Ukutshengisela ezitaladeni kweleMelika bekuqhubeka ngoMgqibelo endaweni ezitshiyeneyo phezu kokwesulwa kwesinqumo ebesisipha abesifazana bakulelilizwe ilungelo lokukhipha izisu, i-abortion.
Isinqumo sokuvumela lelilungelo, esaziwa ngokuyi yiRoe Vs Wade, sethulwa yinkantolo yeSupreme Court ngo1973.
Kodwa umthethwandaba munye usesulile ngoLwesihlanu usithi sephula umthetho. Uthi abantu ezabelweni zabo yibo abamele bazikhethele ukuthi bayalifuna yini lelilungelo, hatshi ukutshelwa okokwenza nguhulumende.
Abanengi batshone bebuthene phambi kweSupreme Court eWashington DC bechothoza lumthethwandaba.
Abebandla elibusayo elamaDemocrats bayasisola isinqumo lesi kodwa abebandla lamaRepublicans bayasincoma ngoba besithi ukuvumela abantu ukukhipha izisu kufana lokubulala.
Isizalwane seZimbabwe esihlala eMelika uNkosikazi Priscilla Ndlovu uthi udaba lolu lukhanya lulezombusazwe phakathi.