amalinks wokungena

Breaking News

Umdlali Wenguqu Olodumo uNakamba Usiza Abasakhulayo eHwange


UMarvelous Nakamba usesikolo lapho aqala khona izifundo zakhe. (VOA)

Umdlali wenguqu olodumo uMarvelous Nakamba usethembise ukwengeza usizo alupha abantwana abaswelayo esigabeni seHwange esabelweni seMatabeleland North.

UNakamba wethekelele eHwange lapho azalelwa khona njalo uhambe wayafika ezikolo ezibalisa eseDinde Primary School, Sir Humphrey Gibbs kanye leWankie Secondary School. UNkosikazi Sithabile Viki, umphathisikolo seDinde, usele ejabule kakhulu ngemva kokuba uNakamba ethembise ukubayakhela indlu zokufundela ezintathu.

“Sifisa uNkulunkulu abusise umntanethu aqhubeke ehlohla ukuze umsebenzi uhlale ukhona akhumbule abanawakhe, siyabonga kakhulu. Lani abe (Marvelous Nakamba) Foundation elamupha umqondo owokuba asincedise, siyabonga.”

Umdlali wenguqu uMarvellous Nakamba esikolo lapho afunda khona eHwange.
Umdlali wenguqu uMarvellous Nakamba esikolo lapho afunda khona eHwange.

Phezu kokwakha izindlu zokufundela, uNakamba uzalungisela ababalisi amakamelo awokuhlala wona angekho esimeni esihle aphinde akhuphule inani labantwana ababhadalela imali esikolo seDinde lifike kumakhulu amabili - 200. Unobhala wenhlanganiso yeMarvelous Nakamba Foundation, uBrian Moyo, uthi isikolo seDinde Primary sisenhliziyweni kaMarvelous ngoba sisekhaya kibo lapho athwetshulwelwa khona yingwe.

“Angaba engumZimbabwe kodwa nxa ekhuluma ngekhaya ukhuluma ngalapha esinyathele khona. Yikho ke ufikile wabona wakhathezeka kakhulu ebona indlu lapho afundela khona. Isidabukile, ilemkenke, isigugile ngitsho laphansi isidabukile. Kumkhathaze waze wathi kulokhu ebengivele ngikwenza ngincedisa abantwana, ngicela ukuthi ngincedise futhi ukuthi sibe lesakhiwo esitsha esilezindlu zokufundela ezintathu.”

Ezinye izikolo ezizathola usekelo oluvela kuMarvelous Nakamba Foundation eHwange ngezibalisa eseSir Humphrey Gibbs, lapho afunda khona ugwalo lwakuqala kanye leseWankie Secondary, lapho okwafunda khona uyise, uAntony. UNorman Kwami, Umbalisi owafundisa uyise, uthi ithalenta lokudlala ibhola uMarvelous walithatha kuyise owayengunozinti owayebamba okwamagama.

“UAntony wayebamba okuzwayo. Wayengunozinti wethu okweminyaka eminengi. Sasisithi singafika koBulawayo sasingadliwa. IMzilikazi eyayilabo Peter Ndlovu, oBenjamin Nkonjera laboMakheyi Nyathi sayidla kumncintiswano we Coca Cola. Sabadla sekutshwaywa imbekwa uAntony engunozinti.”

Phezu kokubhadala imali efunakala ezikolo, inhlanganiso yeMarvelous Nakamba Foundation isizathengela izifundi lempahla zesikolo. Linhlanganiso ibhadalela imali yesikolo abantwana abedlula inkulungwane – 1,000 elizweni lonke jikelele. UMarvelous Nakamba udlalela iqembu lenguqu eleAston Villa eliselizweni laseNgilandi.

Facebook Forum

XS
SM
MD
LG