WASHINGTON DC - Amapholisa athi adubule abulala abantu abane abanakanelwa ukuthi yizigebengu ezitshontshe imota edolobheni leGwanda ngoLwesithathu.
Isehlakalo lesi senzakale ngehola lesithathu emini. Isikhulumeli samapholisa uMnu Paul Nyathi uthi bazakwethula imininingwane egcweleyo ngokuya kwesikhathi.
Kodwa amanye amapholisa eGwanda atshele iStudio 7 ukuthi abane laba bebehlome ngesiphamaso sombhobho esingadubuliyo.
Babikwa bekhombele owesifazana obehamba ngemota bangena emoteni yakhe bayamtshiya egangeni ngehola letshumi ekuseni.
Owesifazana lo usuke wayamangala emapholiseni, wona aphange aphuma ijumo esethungatha abasolwa laba, kubike abazi ngokwenzakeleyo.
Amapholisa athe ngokubathola ahlasela ngamandla ngoba etshelwe ukuthi bahlomile ahle abadubula bonke bafa.
Ukhansila weGwanda uMnu Jastone Mazhale utshele iStudio 7 ukuthi ubugebengu sobubhahile kakhulu eGwanda.
Facebook Forum