Umahluli wedale leHigh Court ngoLwesine walile ukunika uMnu. Job Sikhala loMnu. Godfrey Sithole isibambiso se-bail esithi balakho ukwethusela abafakazi njalo lolwephula umthetho.
UJustice Lucy Mangwari uthe uSikhala loSithole, abakubandla eliphikisayo eleCitizens Coalition for Change elikhokhelwa nguMnu. Nelson Chamisa, kumele bevalelwe eChikurubi Maximum Prison amacala abo aze athethwe ngokupheleleyo.
USikhala wetheswa icala lokuthi watshotshozela udlakela esililweni sika muyi uNkosikazi Moreblessing Ali, okucatshangelwa ukuba wabulawa ngamalunga ebandla leZanu PF.
Isidumbu sika Nkosikazi Ali satholakala sijikelwe emgodini omdala eNyatsime esigabeni seBeatrice.
Umdeni wakhe umi kancane ukuba ancwatshwe usithi kumele kujeziswe abambulalayo engakangcwatshwa.
Ibandla leZanu PF lithi alazi lutho ngokubulawa kuka Nkosikazi Ali.
USikhala loSithole, owetheswa icala lokuthi wathwala amalunga eCCC ahlasela abasekeli bebandla elibusayo, bamelwe emthethwandaba nguMnu. Jeremiah Bhamu loMnu. Alec Muchadehama, abakunhlanganiso yamagqwetha eyeZimbabwe Lawyers for Human Rights.
Omunye wabasekeli besikhulumeli leCCC, uMnu. Ostallos Gift Siziba, obesemthethwandaba, uthi kuyamangalisa okwethulwe nguJustice Mangwari.
“Kulusizi ngenxa yokubana amalunga edale lephalamene asencitshwe ibail yiHigh Court okuyinto esingayikhangelelanga ngenxa yokuthi laba ngabantu abangelacala. Ungakhangela khathesi eNyatsime, uCouncilor weZanu PF, onguye uperpetrator, isigilamkhuba, uhamba scotfree engalayo icharge kodwa abantu bethu abangama-victims, yibo abahlukunyezwayo. Akulanto ezosibuyisela emuva njalo akusoze kubuyisele muva ama-supporters ethu lama-leaders ethu ngoba siyaqhubekela phambili siyazi ukubana ekugcineni kwakho konke, i-victory ye-Citizens Coalition for Change, izamisa konke lokhu kuhlukunyezwa kwethu, lokuhlukunyezwa kwama-supporters ethu.”