amalinks wokungena

Breaking News

Odabuka eZimbabwe Obulele Umntwana eBotswana Wathengisa Izitho Zakhe Usefake Abanye Bakhe Enkingeni


Amapholisa akwele Botswana ...

Abadabuka eZimbabwe basedakeni kwele Botswana kulandela ukubotshwe kuka Lovemore Sithole okuthiwa ubulele umntwana okade edingwa kakhulu kwele Botswana.

USithole, odabuka eZimbabwe oleminyaka engamatshumi amathathu lasikhombisa, wetheswa umlandu wokubulala ingane, uTlotso Karema, obeleminyaka eyisikhombisa.

Amapholisa akwele Botswana akhiphe umbiko ngoLwesine othi uSithole umiswe emthethwandaba edolobheni leLobatse ngoLwesihlanu.

UTlotso wacatsha ngesikhathi evela esikolo ngoMbimbitho lonyaka. USithole ubethandana lomama kaTlotso njalo ehlala labo.

Abantu batshengisela eLobatse bavimba imigwaqo balimaza lamapholisa besithi kumele kudingwe obulele uTlotso.

Amapholisa athi uSithole uvumile ukuthi nguye owathumba ingane le waseyibulala.

Kulembiko ethi ingane ibulewe kuyindlela yokusebenzisa izitho zakhe. USithole ubikwa ethengise izitho lezi ngemali enafika amapula azinkulungwane ezingamakhulu amabili (P200,000).

Isehlakalo lesi sifaka igama labadabuka eZimbabwe edakeni kungensuku ngemva kokuba uMongameli Mokgweetsi Masisi ethe indlala yiyo edala ukuthi abeZimbabwe bedale amacala emazweni angomakhelwane.

AbeZimbabwe abahlala eBotswana abafana loNkosikazi Bonang Mdlongwa bathi okungabe kwenziwe nguSithole kuyinto embi engcolisa ibizo labantu bekhaya.

“Kungcolisa ibizo labantu beZimbabwe kakhulu. Kuzakwenza ukuthi abantu bekhaya bephile nzima kakhulu phezu kokuthi vele abantu bathi abeZimbabwe bayahlupha.”

UMnu. Mandla Moyo, ohlala eGaborone, laye usele ebambe owangaphansi phezu kwesehlakalo lesi. Kodwa uthi icala licala alikhethi mhlobo.

“Ibuhlungu lindaba kodwa icala licala alikhethi ukuthi unguMotswana noma ngubani. Umthetho kumele uthathe indlela yayo.”

UMoyo uqhubeke esithi kodwa kuliqiniso ukuthi isenzo lesi esiyenza uSithole acatshangelwe, kuzangcolisa ibizo labeZimbabwe.

“Akusoke kwekele ukungcolisa ibizo labantu beZimbabwe, abantu bazakhuluma. Kodwa futhi iqiniso likhona futhi khonapho. Abantu bakithi balambile, ungabona umuntu esenza lokhu ukuthi athole imali yinto embi.”

Umthethwandaba uthi uSithole kumele aqhubeke evalelwe esitokisini kuyindlela yokuvikela impilo yakhe ngoba kulokhe kulokuthukuthela kumphakathi phezu kwesehlakalo lesi. Usezaphenduka emthethwandaba njalo ngoLwesibili. Icala lokubulala umuntu kweleBotswana lithwala isigebo sokulengiswa.

Isehlakalo lesi sifika ngesikhathi abeZimbabwe bazithola bebhekwe ngamehlo abukhali emazweni angomakhelwane, ikakhulu kwele South Africa. Izondo yabo kuza iyakhula besetheswa umlandu wokudala amacala, kanye lokuthatha imsebenzi yezizalwane.

Facebook Forum

XS
SM
MD
LG