amalinks wokungena

Breaking News

Uhulumende Ayisuye Obasela Umlilo Womkambo WeDola leMelika Owensitha: Mangudya


Usibalukhulu weRBZ, uDr John Mangudya

UMangudya uthi kuqakathekile ukuthi uhulumende akhangelisise indlela athenga ngayo imali lamankampani kanye lendlela ezisetshenziswayo ukuwabhadala.

Harare ........

Usibalukhulu webhanga elikhulu lelizwe i-Reserve Bank of Zimbabwe, uDr John Mangudya uthi akusi qiniso ukuthi inkinga zokukhula komkambo omnyama zibangelwa yibo ngoba bengasatholisi abamankamani imali yakwamanye amazwe, esithi abamankamani athengisa impahla kumbe ukuqhuba imisebenzi kahulumende, yiwo aya kulowo mkambo ukuyathenga imali.

Echasisa indlela umkambo oweAuction System osebenza ngayo, kukhomidi yedale lephalamende ebona ngezokuhlelwa kwemali kahulumende, i-Parliamentary Portfolio Committee on Budget and Finance, u-Mangudya uthi udaba lokuthi uhulumende uthatha isikhathi sakhe ukuhlawulela leyomali, lawo mankampani athengisela uhulumende impahla afaka intengo eqonge kakhulu okuthiwa ngesingisi yi-Forward Pricing njalo lapho esebhadaliwe leyo mali yakuleli, aya khona emkambo omnyama ukuyathenga imali yakwamanye amazwe besithi ngoba amankampani la afuna ukulondoloza imali le ikumali yakweleMelika.

UMangudya uthi kuqakathekile ukuthi uhulumende akhangelisise indlela athenga ngayo imali lamankampani kanye lendlela ezisetshenziswayo ukuwabhadala.

“ Kutsho ukuthini lokhu ngolimi lwabantu oluvamileyo?. Isibonelo, esikhundleni sokusebenzisa intengo yemali esemthethweni ngaleso sikhathi, inkampani inquma ukusebenzisa eqonge kakhulu, icabanga ukuthi ngaleso sikhathi izokube isifike kuleyo abayebe beyithiyileyo. Lokuthi lapho uhulumende esewahlawulele lamankampani, aqonda khona emkambo omnyama ukuyathengisa imali yawo. Ma lokho kusenzakala kutsho ukuthi wonke umnotho uyalandela. ”

Kodwa umnumzana Effie Dlela Ncube, ongumcebisi kwezokulondolozwa kwelungelo labathengi kunhlanganiso eyeNational Consumer Rights Association - NACORA uthi okutshiwo uMangudya yikucatsha ngomunwe.

“Ukucatsha ngomunwe akusebenzi, i-Reserve Bank imene ikhangelane lesimo esikhona ngqo, ingaphiki into esegcekeni. Okukhulisa umkambo omnyama othengisa imali yangaphandle yikuthi kayitholakali elizweni, ayitholakali ema-bank, ezomnotho kaziyenzi leyo mali. ”

Kusenjalo uMangudya uthi eleZimbabwe alilawo amandla wokuthi libe ngelisebenzisa imali yakweleMelika njengesetshenziswa nsuku zonke. Inkulumo ka Mangudya iza ngesikhathi kulokukhalaza okukhulu ukuthi ngabe ilizwe lisebenzisa imali yakweleMelika njengendlela yokulungisisa inkinga ezikhona ehlangothini lwezomnotho, ukukhula lokuqhela komkambo omnyama elizweni, ukuqhubeka iphela amandla imali yakuleli kanye ukuqonga kwentengo yempahla.

UMangudya uveze lokhu njalo ngesikhathi evela phambi kwekhomodi yedale lePhalamende ebona ngezokuhlelwa

kwemali i-Parliamentary Portfolio Committee on Budget and Finance, esithi imithetho ebekelwa uhlangothi lwezemali kanye leziqondiso zakhona kuyingxenye yemizamo yakhe uhulumende ukuthi alungisise inkinga ezikhona kuloluhlangothi.

Kodwa u-Ncube uthi le kuyiyona ndlela engasiza ukuthuthukisa umnotho welizwe okwamanje, hatshi ukube lokhe abantu betshayelwa imithetho engapheliyo.

“ I-dollar leZimbabwe ngeke liqine nje ngokutshayelwa umthetho, liqiniswa ngezomnotho, ezingekhoyo. Ngakho, okungcono ke yikuthi kusetshenziswe imali yangaphandle lokho okuthiwa okuthiwa yi-Dollarisation, yikho okuzavikela abantu ekuthini izinto zingakhweli zisiya phezulu kuso sonke isikhathi, bakwazi ukuthi impilo yabo bayihlele ngendlela efaneleyo. ”

Amalunga ekhomidi yedale lephalamende agoqela umnumzana Energy Mutodi weZanu PF, umnumzana Rusty Markham lomnumzana Willas Madzimure oweCitizens Coalition for Change - CCC, baveze ukukhathazeka ngaloludaba lokuthuthi imali yakuleli iqhubeka isenziwa ukuthi iphele amandla ayo kanye lokuthi uhulumende uhlawulela eminye imithelo yakhe esebenzisa imali yakwamanye amazwe. Bathi lokhu kukhanya uhulumende ngokwakhe engayithembi imali yakhe besithi imali yakuleli isiseduze lokwaliwa ngabantu njengalokho okwenzakala ngomnyaka ka2009.

Facebook Forum

XS
SM
MD
LG