amalinks wokungena

Breaking News

Linqobile Futhi Iqembu LamaChevrons


Cricket Chevrons.

Iqembu leZimbabwe yilo eliqale ukutshaya ibhola labuthelela ama runs alikhulu lamatshumi amane lesithupha, 146, lilahlekelwe ngabadlali abayithoba minwe mbili.

Bulawayo...........

Iqembu labesilisa elimela ilizwe emdlalweni kakhilikithi linqobe eleJersey ngama runs angamatshumi amabili lantathu emdlalweni walo wesibili kumkhankaso wokudinga amaqembu azakuyaphatheka kumncintiswano wenkezo yamazwe womhlaba, eyeICC Men’s T20 World Cup, ozaqhutshelwa kweleAustralia

Iqembu leZimbabwe yilo eliqale ukutshaya ibhola labuthelela ama runs alikhulu lamatshumi amane lesithupha, 146, lilahlekelwe ngabadlali abayithoba minwe mbili.

Ukaputeni weqembu leZimbabwe uCraig Ervine uthi bebevele behlose ukubuthelela ama runs alikhulu lamatshumi amahlanu.

U-Craig Ervine uKaputeni weqembu elimela iZimbabwe emdlalweni kakhilikithi elamaChevrons
U-Craig Ervine uKaputeni weqembu elimela iZimbabwe emdlalweni kakhilikithi elamaChevrons

“Besicabange ukuthi singazifaka esimeni esihle nxa singafikisa ikhulu lamatshumi amahlanu njalo sibonga uLuke Jongwe labanye abayenze siphose silifikise lelonani,” kutsho uErvine.

UJongwe utshaye ama runs angamatshumi amabili lathoba munwe munye ngamabhola alitshumi lantathu njalo ulandele uSean Williams kubadlali beqembu leZimbabwe abathole amaruns amanengi.

Umdlali weqembu leChevrons, uSean Williams
Umdlali weqembu leChevrons, uSean Williams

UWilliams nguye okhethwe ukuba ngumdlali odlale kuhle emdlalweni wanamhla ngemva kokuba etshaye ama runs angamatshumi amahlanu lesikhombisa ngamabhola angamatshumi amathathu lathoba munwe munye.

“Ngokubona kwami abantu bebekhangelele ukuba sitshaye ama runs amanengi ngemva komdlalo wethu wakuqala. Isimo senkundla singaguquka kodwa inhlelo zethu kazintshintshi njalo nxa singaqhubeka silandela lokho esiyabe sikuvumelene njengeqembu sizaqhuba kuhle sibe labadlali abadonsa kanye kanye.

Inkundla yakhona inkulu njalo ibhola alitshayeki lula kodwa wonke umdlali engenza lokho okumele akwenze konke kuzahamba kuhle,” kutsho uWilliams.

Iqembu leZimbabwe lele Jersey akusibaya sikaGroup A ndawonye leleUnited States of America kanye leleSingapore.

Iqembu leZimbabwe leleUnited States alemiklomelo emine iqembu ngalinye ngemva kokuba eleMelika linqobe eleSingapore nge 132 runs emdlalweni walo wesibili.

Emidlalweni yosuku lwakuqala ngoMvulo eleZimbabwe linqobe eleSingapore ngama runs angu 111 kuthi ele USA lona litshaye eleJersey ngama wickets ayithoba minwe mbili.

NgoLwesine iqembu leZimbabwe lizadibana leleUnited States emdlalweni wokucina owezibaya njalo elizanqoba lapho yilo elizaphutsha liphezu kwengalane yemiklomelo kusibaya sikaGroup A.

Ukaputeni weqembu leZimbabwe uErvine uthi kuzamele babophe ziqine ngoLwesine.

“Ngumdlalo omkhulu kumaqembu womabili njalo thina kuzamele siqine ngalokho ebesikwenza kuhle hatshi ukuba sizihluphe ngalabo esizadlala labo,” kutsho uErvine.

Kumidlalo yesibaya sikaGroup B edlalwe namhla iqembu leNetherlands linqobe eleHong Kong ngamawickets ayisikhombisa kuthi elePapua New Guinea linqobe eleUganda ngamawickets ayithoba minwe mbili.

Limpumela itshiye iqembu leNetherlands lihlezi phezu kwengalane lilemiklomelo emine kuthi eleUganda kanye lelePapua New Guinea alemiklomelo emibili ikanti eleHong Kong lileqanda.

NgoLwesine iqembu leNetherlands lizadibana leleUganda kuthi eleHong Kong lizadlala lelePapua New Guinea.

Facebook Forum

XS
SM
MD
LG