amalinks wokungena

Breaking News

Amapholisa Athi Akhathazekile Kakhulu Ngokwanda Kwezehlakalo Zokubulalana Kwabantu


Kirpan Sikh
Kirpan Sikh

WASHINGTON DC - Amapholisa athi akhathazekile ngokwanda kwezehlakalo zokubulalana kwabantu elizweni ngenxa yezizatho ezitshiyeneyo ezigoqela ubugebengu.

Isikhulumeli samapholisa uMnu Paul Nyathi uthi abantu kumele bahlalisane kuhle njalo badinge umlamulankunzi nxa bethe baba lokungavumelani.

Esipha umzekeliso, uNyathi uthe baphakathi kokuphenya udaba lokubulawa kowesilisa weJotsholo, eTshongogwe, uKelvin Ndlovu, yena obikwa etshaywe ngumnewabo ngensimbi yengolovana.

EBeitbridge lakho amapholisa athi aphenya udaba lokubulawa kukaNtuweleni Mbedzi onakanelwa ukuthi utshaywe ngumntwanakhe ogula umkhuhlane wengqondo.

KoBulawayo amapholisa aphenya udaba lokubulawa kukaYakani Mpofu otholakale egwaziwe esiswini amathumbu ephandle eLuveve. Ukubala izehlakalo lezi yikuthanda.

Ocubungula ezenhlalakahle kazulu njalo eyisiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi ukutshabalala komnotho ngokunye okubangela ukuthi abantu babulalane.

please wait

No media source currently available

0:00 0:02:46 0:00

Kolunye njalo udaba, amapholisa athi abophe umtshayeli webhasi labokhondakita abathathu abafunyanwe bethwele imbanje ezilesilinganiso se50kg.

Amapholisa athi abasolwa laba nguWonder Ndlovu, onguye umtshayeli webhasi, uJanet Dhimigu, uPasswel Gidza kanye loBrighton Mangwiro. Babotshelwe eKadoma.

XS
SM
MD
LG