amalinks wokungena

Breaking News

Selifike Kuzinga Eliphezulu Iqembu Lekhilikithi EleZimbabwe Chevrons Emidlalweni yeT20 World Cup


Sean Williams

Selifinyelele ukuyadlala kumncintiswano wezizwe zomhlaba owe ICC Men’s T20 World Cup iqembu elimela iZimbabwe emdlalweni kakhilikithi, elamaChevrons, ngemva kokunqoba elikwenze elePapua New Guinea ngama runs angamatshumi amabili lesikhombisa.

Iqembu leZimbabwe yilo eliqale ukutshaya ibhola labuthelela ama runs afika phose amakhulu amabili, 199, lilahlekelwe ngabadlali abahlanu.

Kuthe iqembu lePapua New Guinea seliphendula lenelisa ama runs angu 172, lilahlekelwe ngabadlali abayithoba minwe mbili.

Intathelizindaba yezemidlalo uNash Mkokwayarira, obephakathi enkundleni yeQueens Sports Club uthi kuyajabulisa ukuba iqembu leZimbabwe lizakuyancintisana lamanye amazwe kumidlalo yezizwe zomhlaba.

“Kade bebuthelele amaruns amanengi kakhulu afika 199, okutsho ukuba iqembu leZimbabwe belilokhu lisiba ngcono ngokuhamba kwemidlalo.

Kutshengisela ukuthi ikusasa yomdlalo kakhilikithi kweleZimbabwe lihle kakhulu ngoba ukwenelisa kwabo ukungena kufinal kutsho ukube sebethole ithuba elokuyadlala kumidlalo yezizwe zomhlaba okuyinto ezakwenza ukuba umdlalo wohlobo lweT20 kwelakithi ube kuzinga laphezulu.”

Iqembu leZimbabwe lizadibana leleNetherlands ngeSonto kudingwa intshantshu zeICC Men’s T20 World Cup Qualifier ngemva kokuba iqembu leNatherlands linqobe eleUnited States of America ngamawickets ayisikhombisa emdlalweni oqhutshelwe eBulawayo Athletic Club.

Sikhangele umdlalo wenguqu. Imidlalo yesigaba seCastle Lager Premier Soccer League ingena kuviki yamatshumi amabili lanye kulimpelaviki njalo amaqembu azadlala ngokulandelayo.

Kumidlalo yangoMgqibelo iqembu leZPC Kariba lizadibana leleCranborne Bullets ngaseNyamhunga, iqembu leBulawayo City lizadlala leleTenax ngaseBarbourfields, iqembu leNgezi Platinum Stars lizangqikilana leleCaps United ngaseBaobab, iqembu leHarare City lizadlala leleTriangle ngaseNational Sport Stadium, iqembu leManica Diamonds lizadlala leleHerentals ngaseVengere kuthi iqembu leWhawha lizemukela eleHighlanders ngaseAscot.

NgeSonto iqembu leBulawayo Chiefs lizadlephana leleChicken Inn ngaseLuveve, iqembu leDynamos lizadibana leleFC Platinum ngaseNational Sport Stadium kuthi iqembu leBlack Rhinos lizadlala leleYadah ngaseVengere.

Facebook Forum

XS
SM
MD
LG