UMnu. William Ruto, obengumsekeli kamongameli wakwele Kenya, usekhethwe nguzulu ukuba ngumongameli omutsha. Kuke kwaba lokuxokozela endaweni lapho okwethulwe khona impumela yokhetho lukamongameli kulandela ukuphuza ukwenza lokhu ngabaqhuba ukhetho.
UMnu. Wafuka Chebukati, umgcinisihlalo weIndependent Electoral and Boundaries Commission wethule impumela le eNairobi kulandela ukuxokozela eBouma lapho abantu abahlale isikhathi eside bemelele impumela yokhetho lolu.
URuto ubonge kakhulu abantu bakwele Kenya abamvotele kukhetho lolu.
Kukhanya engani abasekela uMnu. Raila Odinga baqale ukutshengisela endaweni ezitshiyeneyo kusanda kwethulwa impumela yokhetho lolu. Bathi ikhomishini le kayiqhubanga ukhetho lolu ngemfanelo. Banengi abadabuka eZimbabwe abalandele obekusenzakala kwele Kenya. Omunye wabo nguMnu. Msongelwa Ndlovu, okubandla leZapu.
UMnu. Effie Dlela Ncube laye ubelulandela ukhetho lolu.
Umkhokheli webandla leMthwakazi Republic Party, uMnu. Mqondisi Moyo, uncoma okwenzakale eKenya.
UMnu. Belive Gaule, okubandla leZanu PF, uthi kumele abantu bemelele labo abaqhuba ukhetho ukuba bethulele uzulu impumela yalo.
Okwamanje abalandeli bomanyano okhokhelwa nguOdinga bayatshengisela emigwaqweni bhekhala ngempumelo yokhetho lolu.