WASHINGTON DC - Ibandla leCCC lithi selisengeza iqula lamagqwetha amela amalunga alo alitshumi lasithupha, 16, agoqela uMnu Job Sikhala loMnu Godfrey Sithole, asebelenyanga ezimbili bevalelwe besetheswa icala lokubangela udlakela esigabeni seNyatsime, eChitungwiza.
Lokhu kuvezwe yisikhulumeli salelibandla uNkosazana Fadzayi Mahere emhlanganweni awenze lentathelizindaba eHarare ngoLwesine.
UMahere uthe abantu laba kumele bakhululwe ngoba bemsulwa. Uveze njalo ukuthi ibandla lakhe selisungule inhlelo zokunakekela imuli zabasolwa.
Uphinde waxwayisa uhulumende ukuthi akhulule abantu laba ngoba esithi bayahlukuluzwa nje ngendaba zombusazwe njengoba sokuyiwa kukhetho luka2023.
UNkosazana Mahere uthe ukuze lolukhetho lube ngolukhululekileyo, kumele uhulumende aguqule okunengi, ama-electoral reforms.
Khepha uMongameli Emmerson Mnangagwa yena uthi konke okumele kuguqulwe sokwenziwa.
Umsekeli wesikhulumeli seCCC uMnu Gift Ostallos Siziba utshele iStudio 7 ukuthi ibandla lakhe likhathazekile kakhulu ngendlela uSikhala labanye bakhe abaphethwe ngayo nguhulumende.
