amalinks wokungena

Breaking News

Abantu Abanengi Bathi Ukhulumele Eceleni uZiyambi Ziyambi Othi Konke Okuhambelana Lombhuqazwe weGukurahundi Kwalungiswa Ngumuyu uMugabe


FILE: Bagebha amathambo abantu ababulawa ngesikhathi sombhuqazwwe weGukurahundi
FILE: Bagebha amathambo abantu ababulawa ngesikhathi sombhuqazwwe weGukurahundi

Inhlanganiso Ezimeleyo Ichothoza uZiyambi Ziyambi Othi Umbhuqazwe weGukurahundi Walungiswa NguMugabe

Abenhlanganiso yeNational Transitional Justice Working Group (NTJWG) bathi bakhathazekile kakhulu ngamazwi kamphathintambo wezemithetho, uMnu. Ziyambi Ziyambi, mayelana lombhuqazwe weGukurahundi, awethule phambi kwekomithi yenhlanganiso yomanyano wamazwe womhlaba eyeUnited Nations Committee on the Elimination of Racial Discrimination.

Lokhu ngokunye kokuphume emhlanganweni wabenhlananiso eyeNTJWG lentathelizindaba owenzelwe eMedia Centre, eHarare, ngoLwesine wokuphendula amazwi kaZiyambi Ziyambi, awethule eGeneva kunsukwana ezisanda kwedlula, phezu kodaba lombhuqazwe weGukurahundi.

Umsekeli kamgcinisihlalo we NTJWG, uMnu. Dzikamai Bere, utshele lumhlangano ukuba kayibaphathi kahle linkulumo kaZiyambi ethi uhulumende akalawo umlandu wokujezisa lokubopha abaphatheka kusiga seGukurahundi ngoba lwalungisiswa yikulobelanwa kwesivumelwano somanyano somnyaka ka1987.

“Ngokomthetho wamazwe omhlaba, indlela yokuxolelana eyabekwa ngomnyaka ka1990, kayisebenzi ekubulaweni kohlanga kanye lobugebengu obuqondiswe ebantwini, okuyikho lapho umbhuqazwe weGukurahundi ongena khona ngokuphelele.”

Eyinye ingcwethi kwezombusazwe lokuhlalisana kuhle kwabantu, uMnu. Mlindelwa Mancitshana, uyawusekela lumbono.

“Ingwe ayiguquli amabala ayo. Kutshengisa ukuthi lokhe belobunyamazana babo bonalobuyana obakudala ngoba siyabona ukuthi ilizwe litshelwe ukuthi sekulekhomishini esikhona ezakhangela udaba lolu, kodwa babuye futhi njalo batshengise ukuthi lolu ludaba osolwadlulayo. Akusahambelani ngoba umongameli siyazi ukuthi watshengisa ukuthi hayi, izinduna lamasabhuku yibo abazasebenza udaba lolu. Kodwa babuye futhi bakhulume ngenye indlela so sengathi ke bazingela ngezinja babuye baduhe lenyamazana.”

UMnu. Effie Dlela Ncube, owenhlanganiso ebona ngezamalungelo abathengi eyeNational Consumer Rights Association, uyekusola okwthulwe nguZiyambi.

“Okokuqala nje, akuqondanga ukuthi athi udaba lweGukurahundi selwalungiswa, alukalungiswa lakancane, akula lutho oselwenziwe ukuthi kulungiswe. Ubuhlungu lokhe buqhubekela phambili, izinto ezinengi lokhe zisonakala, lezo ezaqalwa yiGukurahundi, lokhe kusiya phambili. Ngakho-ke lokho akutshele umhlaba ngamanga.

“Kusadingeka ukuthi kulungiswe izinto ngendlela efaneleyo. Kanti-ke futhi kuyaveza kahle kamhlophe ukuthi uhulumende kazinikelanga lakancane ukulungisa udaba lweGukurahundi, ufuna ukube lokhe ekhuluma, ekhuluma, ekhuluma echitha isikhathi sabantu ukuze izinsuku zibe zihamba, abantu babe besifa kungalungiswanga.”

Lanxa abakuhulumende bengacaci ngeGukurahundi, uphenyo olwenziwa ngabenhlanganiso eyeCatholic Commission for Justice and Peace iveza sobala ukuthi kulabantu abanakanelwa ukuba bedlula inkulungwane ezingamatshumi amabili – 20,000 ababulawa yiGukurahundi, okwakuthiwa idinga abahlamuki abadlelana lebandla leZapu elalikhokhelwa ngalesos’ikhathi nguJoshua Mqabuko Nyongolo Nkomo.

UNkomo wakuphika lokhu esithi abahlamuki babefakwe emphaathini libanla leZanu PF elalisesaba ukunqotshwa ngele PF Zapu.

XS
SM
MD
LG