amalinks wokungena

Breaking News

Iqembu leBosso Linqoba eleCaps United Emdlalweni wePSL


Babukele iqemmbu leBosso eBF ...

Iqembu leHighlanders linqobe eleCaps United nge 2 ka 1 emdlalweni weCastle Lager Premier Soccer League oqhutshelwe enkundleni yeBarbourfields namhla.

Iqembu leHighlanders lihlohlelwe nguDevine Mhindirira kanye loWashington Navaya kuthi eleCaps United lihlohlelwe nguWilliam Manondo. Kweminye imidlalo edlalwe namhla iqembu leManica Diamonds linqobe eleCranborne Bullets nge 2 ka 1 kuthi eleHerentals linqobe ele Tenax nge 3 ka 1.

Sikhangele umdlalo kakhilikithi: Iqembu labesilisa elimela ilizwe emdlalweni kakhilikithi linqotshwe ngama wickets amahlanu liqembu leAustralia emdlalweni wakuqala owohlobo lweOne Day International oqhutshelwe edolobheni laseTownsville. Iqembu leZimbabwe yilo eliqale ukutshaya ibhola lathola ama runs angamakhulu amabili lilahlekelwe ngabadlali bonke. Kuthe eleAustralia seliphendula libuthelele ama runs angamakhulu amabili lanye (201/5) kuma overs angamatshumi amathathu lantathu.Intathelizindaba yezemidlalo UDumi Praise Dlakama uchasisa ukuba iqembu leZimbabwe lilahleke ngaphi.

“Abaqale ukutshaya ibhola bazamile sibili kodwa inkinga ibe yikuthi laba ababalandeleyo bahle baphanga baphuma. Kuke kwaba lesikhathi lapho iqembu leZimbabwe ebeselibuthelele ama runs alikhulu elilamatshumi ayithoba minwe mbili lanhlanu. Lokhu bekuthembisa ukuba mhlawumbe leliqembu lingabuthelela inani elithe xaxa kodwa akusabanga njalo.”

Umdlalo wesibili phakathi kwamaqembu lawa ukhona mhla zingamatshumi amathathu lanye kuthi owesithathu ukhona mhla zintathu ngenyanga ezayo.

Imidlalo yeODI yiyo esetshenziswa yinhlanganiso yeInternational Cricket Council ukudinga amaqembu azaphatheka kumncintiswano wezizwe zomhlaba ozaqhutshwa ngomnyaka ozayo.

Sikhangele umdlalo webhola labesifazane elokuqaga: Iqembu labesifazane elimela ilizwe emdlalweni wokuqaga selitshayelwe ihlombe ngokuphumelela kwalo ukuba ngelinye lamaqembu azakuyadlala kumncintiswano wezizwe zomhlaba ozaqhutshelwa elizweni laseSouth Africa ngomnyaka ozayo.

Owayeyintatheli yezemidlalo, uThandiwe Moyo, yena osesebenzela iqembu lomdlalo wenguqu eleBulawayo City, uthi leliqembu lenze into ebukekayo kakhulu.

“Siyababonga abeqembu lamaGems ngokufinyelela kwabo ukuyadlala kumidlalo yezizwe zomhlaba. Singabe sisemidlalweni etshiyeneyo kodwa siyabasekela.

Isifiso sethu ngesokuthi basimele kuhle khonale kumidlalo yezizwe zomhlaba.”

Umncintiswano wezizwe zomhlaba owe2023 Netball World Cup uzaqhutshelwa edolobheni leCape Town ngenyanga kaNtulikazi ngomnyaka ozayo njalo izwekazi laseAfrica lizamelwa ngamazwe abalisa eleSouth Africa, eleMalawi eleZimbabwe kanye leleUganda.

Facebook Forum

XS
SM
MD
LG