UCollin Nyambiya, owadlalela amaqembu abalisa eleZiscosteel, eleRailstars kanye leleHighlanders F.C, sowaqala isikolo somdlalo wenguqu.
Isikolo seYoung Flying Stars Soccer Academy sizafikisa iminyaka elitshumi ngenyanga kaMfumfu njalo uNyambiya uthi izithelo zemisebenzi yabo seziqala ukubonakala.
“Abafana sebeqala ukuphuma khathesi ngoba sithe siqala abakhulu bakhona bebeleminyaka elitshumi lanye, okutsho ukuba khathesi sebeleminyaka engamatshumi amabili lanye. Sesilabafana abane asebehambe eMelika. Laba ngababalisa uNabil Ismail, uTatenda Mukudu, uSean Matika kanye loDenzel Kaviza. Ngabadlali abadlala ibhola elinathisa amanzi kodwa ngenxa yokuthi bebekwanisa esikolo bathole ama football scholarships eMelika.”
Kuminyaka elitshumi uNyambiya usesebenze labaqeqetshi ababalisa abadlali abake badla ubhedu ababalisa uMaster Masiku, uSiza Khoza kanye lowayengukaputeni weqembu labesifazane elimela ilizwe uNomsa ‘Boyz’ Moyo.
“Ngisebenza leFlying Stars Academy ngingumsekeli kamqeqetshi weqembu lamajaha aleminyaka angaphansi kwamatshumi amabili lanye. Ngingumqeqetshi wamaqembu abafana abaleminyaka elitshumi lantathu kanye leqembu labafana abaleminyaka elitshumi lambili.”
UNyambiya uthi isimo somnotho singabe sinzima kodwa ukubakhona kwabo okweminyaka elitshumi kukhomba ukuzimisela kwabo.
“Ikusasa yesikolo sethu kumele ibengcono. Siqale vele kunzima asizange sikuthole kulula kodwa senelisile ukusimela lesosimo.”
Kumele siqhubekele phambili size siphumelele lathi ukuthengisa abadlali. Sekuyisikhathi sakhona, yikho esesikukhangelele. Sekuseduze lapho esiyakhona.”
UNyambiya uzalelwe edolobheni leVictoria Falls kodwa ukhulele edolobheni lakoBulawayo lapho adlalele khona amaqembu abalisa eleStops Camp kanye leleOtrick Spares.
Ngomnyaka ka1997 uthethwe liqembu leZiscosteel enkabazwe kwathi ngo2000 ubuye kuqembu leRailstars koBulawayo. Ngo2003 uphume wayadlala phetsheya kweleAlbania kwathi ngomnyaka ofanayo uphenduke wazodlalela iqembu leShabanie Mine.
Ngo2004 ubuyele njalo kuqembu leRailstars kwathi ngo2005 udlalele iqembu leHighlanders okomnyaka owodwa wasebuyela futhi kuRailstars ngo2006.
Uphinde waphuma njalo elizweni ngomnyaka ka2008 lapho alubhekise kweleBotswana lapho adlalele khona iqembu leBoteti Young Fighters lapho adlale khona waze wathatha umhlalaphansi ngo2011 kwathi ngo2012 waqala isikolo seYoung Flying Stars Soccer Academy.