amalinks wokungena

Breaking News

UMnangagwa Unxuswa Emngcwabeni Wendlovukazi uQueen Elizabeth II


UMongameli Emmerson Mnangagwa

EleBhilithane lithi linxusile uMongameli Emmerson Mnangagwa emngcwabeni wendlovukazi uQueen Elizabeth II ngoMvulo ozayo.

Iziphathamandla zesigodlo sommeli weBhilithane eZimbabwe, zethule umbiko enkundleni eyeTwitter ngoLwesine zisithi ngamanga aluhlazatshoko ukuba uMnangagwa utshelwe yiNkosi uCharles III ukuba engabuyi emngcwabeni wendlovukazi ngoba wetheswa izijeziso zomnotho.

Inkundla zokuxhumana lokuzilibazisa zivuke zimemethekisa incwadi yamanga ebibikwa ilotshwe yiNkosi uCharles III isithi uMnangagwa kavunyelwa ukuya emngcwabeni kanina.

Umpathintambo wezokwethulwa kwemibiko, uNkosikazi Monica Mutsvangwa, uthe incwadi leyo esabalaliswayo ezinkudleni zebulenjini ngeyamanga kodwa wala ukuchaza ukuthi umongameli uyahamba esililweni kumbe hatshi.

UMnu. Witness Dube, obona ngokwethulwa kwemibiko kubandla leMDC-T, uthi imfa ivame ukumanyanisa abantu abangabe belesikhathi bexabana.

"Ukumenywa komkhokheli welizwe ubaba uMnangagwa emngcwabeni weNdlovukazi yeBhilithani thina njenge bandla leMDC sikubona njengento etshengisa ubuntu phakathi kwamazwe ethu omabili ekutheni nxa kube lohlupho kuyabanjiswana njengoba nje iNdlovukazi yaMaNgisi le ibingumuntu obengumkhokheli khonangale ebhilithani kanye lakumazwe eCommon wealth. So lokho sikubona njalo kulomthelela wokuthi amazwe omabili atshengisela ukuthi asazimisele ekuthini abelobudlelwano obuhle."

Inkokheli yebandla leZanu-PF esabelweni seMatabeleland North Province, uMnu. Believe Gaule, uthi kulihlazo okwenziwa ngabalwisa uMnangagwa.

"UMongameli kasoze enelise ukuya fika ngenxa yokuthi kula lapha ayakhona emkhosini omkhulu owe United Nations owamazwe owe United Nations. Ngokunjalo uMongameli uzamelwa lilunga lakhe embikweni ophumileyo ukuthi uzamelwa lilunga lakhe elazangaphandle ubaba uFeddrick Shava. Ngokunjalo ke abantu asifundeni ukuthi yonkinto eyabikhulunywa lan a sokufiwe kulabantu abazonda uHulumende weZimbabwe abazonda uMongameli abakhuluma izinto ezimbi ngoMongameli abakhuluma izinto ezimbi ngoHulumende weZimbabwe bathola amathuba okukhuluma into ezingayisizo ngakho ke akelibone khathesi bakhuluma ngento ezinjengalezo lanxa kufiwe besebenzisa izimfa ekukhuleni izinto ezingayisizo ezingamanga."

UMnu. Nhlanhla Ncube, ingcwethi kwezombusazwe, uthi abebandla elibusayo bathabe okumangalisayo ngombiko ocine usethulwa yisigodlo sommeli weBhilithani eZimbabwe.

"Ukunxuswa kwakhe ngibona kuyinto angabe vele ubeyikhalela ukuthi akahambe ayekhona kodwa ke akusizi ngalutho njalo uQueen nxa simkhangele kunengi okubi akwenzayo njengoba ehuquluze umnotho wakithi wonke ilizwe asilalo nje kungenxa yakhe. So-ke mina nxa ngiba khangele bebobabili kabehlukananga okuyangaphi."

Amazwi kaNncube agcizelelwa ngu Mnu Effie Dlela Ncube ingcwethi elwela ilungelo likazulu.

"Khona lokhu nje ukuthi uHulumende weZimbabwe uthabe umanzi ethabela ukuthi umenywe kufunerali kuyinto eyethusa kakhulu. Uyabona ungabona ilizwe selinjalo sisenkingeni enkulu kakhulu ukuthokozela ukuya emfeni ukuthokozela ukuye funerali ayisiyo indlela eqondileyo leyo. Kanti futhi ke singakhohlwa ukuthi ukumenywa kufunerali akutsho ukuthi bayavumelana lawe abaleyo funerali.

“Akutsho ukuthi uhulumende weNgilandi uvumelana lohulumende weZimbabwe lezenzo sika hulumende weZimbabwe ukuohatha kabi ilizwe ukungahloniphi umthetho ukungahloniphi isekelo sombuso ukuphatha kabi izizalwana zeZimbabwe ukuphatha kabi ama reporters abezemisakazo ukuphatha kabi abazezinhlanganiso ezizimeleyo ukuvimbela amaqembu aphikisayo ukuba akhankase ngokukhululeka ukubusa nje ilizwe ngendlela elidilizayo ukugcwala kwe corruption lakho konke abavumelani lalokho.

“Ukukumema emfeni yikukumema nje emfeni akutsho ukuthi ubudlelwane sebuqalile ukuthi sebuhlangene, kutsho nje ukuthi njengoba lawe ungumuntu fika nje lapho okuhlangene khona abantu bekhala uze esililweni."

Indlovukazi yeBhilithane uQueen Elizabeth II ubhubhe mhlaka 8 Mpandula. Ukhangelele ukubekwa ngoMvulo mhlaka 19 Mpandula, eWest Minister Abbey lapho okukhangelelwe inkokheli zamazwe womhlaba ezinengi ukuba zizathi gwaqa emngcwabeni kaQueen Elizabeth kodwa uMnangagwa uthi uyabe engekho lanxa enxusiwe.

Facebook Forum

XS
SM
MD
LG