GWANDA - Uzulu wemaphandleni eGwanda South uthi usekhulekela ukuthi izulu line ngokuphangisa ngoba izifuyo sezinatha nzima nanku amadamu esesitsha.
Inengi selikotshozela izifuyo, okungumsebenzi omkhulu. Izakhamizi ezixoxe lomsakazo weStudio 7 zithi ngaphandle kokuthi izulu liphange line, izifuyo zazo, ikakhulu inkomo zizacuba ziphele du.
Kusenjalo inhlanganiso emela abahlali beGwanda isichothoze umanisipala walelidolobho kulandela ukuhuda kwabahlali beSpitzkop ngemva kokunatha amanzi alengcekeza.
UMnu Collart Moyo, olilunga leGwanda United Residents Association utshele lumsakazo ukuthi lokhu yinto abangayamukeliyo ngoba kufaka izakhamizi engozini enkulu.
UMeya wedolobho UMnu Njabulo Siziba uxolisile wathembisa ukuthi ikhansili isigezise itanka elibangele ukuthi abahlali baphathwe yisihudo.
Umanisipala weGwanda usanda kuthatha umsebenzi wokuhlambulula amanzi ezandleni zeZinwa.
