amalinks wokungena

Breaking News

Likha Phansi Iqembu leBosso Emdlalweni weChibuku Cup


New Highlanders coach Brito

Asephumile kumncintiswano wenkezo yeChibuku amaqembu athi eleHighlanders kanye leleDynamos ngemva kokunqotshwa akwenziwe namhla.

Iqembu leHighlanders liphelelwe ngumphako kumncintiswano weChibuku Super Cup ngemva kokunqotshwa nge 1 ka nya elikwenziwe ngele Bulawayo Chiefs namhla emini.

Ekhuluma emaphethelweni omdlalo umsekeli kamqeqetshi weBulawayo Chiefs uThulani Sibanda uthe, “Yimpumela enkulu kakhulu leyi njalo abafana badlale kuhle kakhulu njalo badlale ngokuzimisela okukhulu. Nxa singaqhubekela phambili sidlala ngendlela esidlale ngayo namha singaya khatshana njengeqembu.”

Umqeqetshi weqembu leHighlanders uBaltemar Brito uvumile ukuba namhla iqembu lakhe likhulelwe ngeleChiefs.

“Sibatshayela ihlombe abeqembu leBulawayo Chiefs. Yebo kambe sidanile ngempumela njengoba singadlalanga kuhle. Asazi kumbe abafana basuke bethuswa yikuba sidlalela inkezo kodwa akula esingakwenza ngaphandle kokuba siqhubekele phambili sizame ukuba siqede sisesimeni esihle kumncintiswano weligi.”

Ohlohlele iqembu leBulawayo Chiefs ngukaputeni walo uMalvin Mkolo yena olitshayele emambuleni ngehlandla lesibili elomdlalo. Zombili iHighlanders leBulawayo Chiefs ziphutshe umdlalo sezisilela ngomdlali oyedwa ngemva kokuba uObriel Chirinda weChiefs lanye lo Peter Muduhwa oweBosso betshengiswe ikhasi elombala obomvu ngehlandla lesibili elomdlalo.

Limpumela itsho ukuba iqembu leChiefs selidlulele kusigaba sesemi – final ndawonye lamaqembu abalisa eleFC Platinum, eleBlack Rhinos kanye lele Herentals.

Iqembu leFC Platinum linqobe eleDynamos nge 4 ka 2 ngemva kokutshaywa kwembekwa ikanti eleBlack Rhinos linqobe eleChicken Inn 10 ka 9 lakho futhi ngemva kokutshaywa kwembekwa.

Nansi impumela yeminye yemidlalo edllawe namhla kweleNgilandi.

Iqembu leBrentford linqotshwe nge 3 ka nya ngeleArsenal, kuthi iqembu leEverton lona linqobe eleWest Ham nge 1 ka nya.

Sikhangele umdlalo kakhilikithi: Iqembu labesifazane elimela ilizwe emdlalweni kakhilikithi liqale kuhle umkhankaso walo kumncintiswano we ICC Women’s T20 World Cup Qualifier njengoba linqobe elePapua New Guinea ngamawickets ayithoba minwe mbili namhla emini.

Iqembu le Papua New Guinea yilo eliqale ukutshaya ibhola lathola ama runs angamatshumi ayithoba minwe mbili lantathu kuma overs angu17.5.

Iqembu leZimbabwe lithe seliphendula lafikisa ama runs angamatshumi ayithoba minwe mbili lesithupha kuma overs angu18.1.

Umdlali weqembu leZimbabwe uSharne Mayers nguye okhethwe ukuba ngumdlali odlale kuhle kakhulu ngemva kokubuthelela ama runs angamatshumi amathathu lantathu.

Iqembu leZimbabwe likusibaya sikaGroup B njalo kusasa ngoMvulo lizadibana lele Thailand kuthi ngoLwesithathu lidlale leleUnited Arab Emirates.

Komunye umdlalo wesibaya sikaGroup B odlalwe namhla iqembu leThailand linqobe eleUnited Arab Emirates ngamawickets ayisikhombisa.

Facebook Forum

XS
SM
MD
LG