amalinks wokungena

Breaking News

USidney Green Owayetshaya Indoda Ibubule Uselolonga Abakumdlalo Wenqindi


Sidney Green

USidney Green, owayengumdlali wenqindi owamanje osengumqeqetshi womdlalo lo, uzama ukulolonga abatshaya eziwayo.

UGreen usevuselele iqembu eleYoung Arts Boxing Academy elalikhona kudala. Leliqembu litholakala eFamona koBulawayo. Uthi umdlalo wenqindi kuye uvele usegazini.

“Ngaqalisa umdlalo wenqindi ngileminyaka phose elitshumi lanye sidlala singabafana nje sizidlalela. Ngithe sengingene kubutho lesizwe abangane bami basebetshela owayengomkhulu weLlewellin Barracks ukuthi kulotshomi oseBrady Barracks okuthiwa nguGreen bathi umbize abuye ngapha basebengithatha. Ngaqalisa ke khonapho umdlalo wenqindi usungene ekhanda njalo ngiwukholisa kakhulu.

“Abanye babengafuni ukudlala lami njalo kwasekulethwa abadlali bomdlalo werugby abelungu ababelemzimba emkhulu ngibatshaya kalula nje ngemizuzwana bebuya belandelana befika phose itshumi.”

UGreen uthi udlale ezilolonga labadlali abanengi abaduma ngeminyaka ilizwe lingakatholi uzibuse.

“Angizange ngithathe umdlalo wenqindi njengomsebenzi kodwa bengiziqeqetsha ndawonye labadlali abanengi abadlala kuzinga laphezulu abafana loRingo Starr labo Kid Power. URingo Starr nguye owangenza ngangena kumdlalo wenqindi. Kwakukhona oTholo Fighter, labo Michael Babalas. UKid Power besizilolonga sindawonye.”

UGreen uthi uncedise abadlali abanengi ababe lodumo kumdlalo wenqindi abagoqela owayeyingqungquthela yesigaba seheavyweight elizweni, uThamsanqa Dube.

“UThamu uyangazi, UThamu wabuya edinga amasu, efuna ngimqeqetshe. Manje wathi ebuya kanti ufuna ukuzwana amandla lami. Ngathi mana kahle ngifundise umfana umdlalo wenqindi. Ngempela ngamfundisa umdlalo wenqindi.”

Intathelizindaba yezemidlalo elodumo, uLovemore Dube, uthi kuhle ukubona abake badlala umdlalo wenqindi bephenduka kuwo bephatheka kunhlelo zokuwuvuselela.

“Kuhle ukubona abadlali bomdlalo wenqindi abakudala abama 1980s abanjengo Sidney Green bephenduka sebengabalolonga abadlali abancane, beqhuba phambili imbali yeqembu elalilodumo elalithiwa yiYoung Arts, elapheka abadlali abanengi ababephethe umdlalo kusigaba semandebeleni ngaleyo minyaka.

“Usebenza labafana abambalwa abesikhaladini. Kuhle ukubona umdlalo ungasiwo wabansundu kuphela kodwa kuleminye imihlobo. Kaqhubekele phambili ngomsebenzi wakhe omuhle.”

Iqembu leYoung Arts Boxing Academy belingelinye lamaqembu aphatheke kumncintiswano wenqindi oqhutshelwe koBulawayo ngoMgqibelo, obubizwa ngokuthi yiNational Boxing Championship.

Umzukulu kaGreen uJayden Joseph ngomunye wabadlali obekumele laye adlale kodwa lowo obekumele adlale laye wesabile ukungena enkundleni.

Facebook Forum

XS
SM
MD
LG