Abebandla eliphikisayo eleCitizens Coalition for Change (CCC) bathi sebeqinisa inhlelo zokukhuthaza ontanga ukubhalisa ukuthola ilungelo lokuvota kanye lokuvota ngobunengi ekhethweni oluzayo luka2023.
Bathi bona bayakwazi ukuba abatsha balokunengi ababhekane lakho okubavimbayo ukuthi babhalise kuthola ilungelo lokuvota, okugoqela ukungabi lezithupha kanye lokuswela izimota zokuhambisa lapho okubhaliswa khona, ikakhulu labo abahlala emaphandleni.
Ngakhoke babhoda emadolobheni kanye lemaphandleni bekhuthaza njalo bencedisa ontanga kuloluhlelo. Istudio7 ixoxe loMnu. Gift Ostallos Siziba, umsekeli wesikhulumeli sebandla leCCC ngaloludaba.
“Thina njenge bandla leCitizens Coalition for Change elithungamelwa nguAvocate Nelson Chamisa, sesiqalise inhlelo zethu zokubana ke sikhuthaze abatsha ukubana beye-register ukuvota. Khathesi sesiqale ukuthi sense imidlalo eyabontanga, eyabatsha ukubana ke sikhulume labo ngendaba you-register ukuvota. Okwesibili njalo sesihamba lapho abatholakala khona. Lapho abayabe bekholisa khona ngama-weekend ukubana sikhulume ngendaba yokuba baregister ukuvota. Kutsho uMnu. Siziba.
Wengeze wathi, “Okwesithathu, sesiqalise indaba ye-messaging, esithi yi-political messaging ngesikhiwa, ukubana sifundise abatsha ukuba ye, lingafuna inguquko, lingafuna umsebenzi, lingafuna inguquko, lingafuna imsebenzi, lingafuna ukubana ilizwe lilungiswe, njalo lingabuya kunhlelo zethu ezinjenga ma-rally, loku-supporter indaba yenguquko kodwa akukho-sufficient nxa lingabhalisanga ukuvota.”
USiziba ucine ngokuthi kuqakathekile ukubhalisa ukuvota kusaselesikhathi ngoba abangeke banelise ukuvota bengabhalisanga. Uthe ibandla labo selisungule inhlelo laph abasebenza labanye ukuthola i-transport yokuthwala ontanga bebasa lapho okubhaliswa khona ukuvota, njalo bebancedisa ontanga ukuba bathole izithupha ezifunakalayo nxa kubhaliswa.
