amalinks wokungena

Breaking News

UVorster Chitema Owadlalela Amazulu FC Uthi Kunzima Ukuqeqetsha Abatsha


UVorster Chitema

Owayengumdlali weqembu leAmaZulu Football Club eyimvimbi eyesabekayo, uVorster Chitema, uthi akulula ukuba ngumqeqetshi wabadlali abasakhulayo.

UChitema ngomunye wabaqeqetshi abasebenza labasakhulayo abeqembu leBulawayo City njalo uthi kungumsebenzi ongekho lula ukuqeqetsha abadlali abasafunda ukudlala ibhola.

“Khona kunzima kodwa njengebantu bebhola lathi sadlula khona. Akukho lula kodwa ngokuhamba kwesikhathi abafana bayakubamba lokho esibafundisa khona.”

Ngesikhathi esadlala umdlalo wenguqu, uChitema ubevala ndawonye lemvimbi ezibalisa uMkhuphali Masuku, uDavid Mkandawire kanye loHerbert Dick njalo bebengabadlali abesatshwa kakhulu ngabagadli ngoba bebefaka unyawo bengalukhuphi. UChitema uthi sekulehlekana nje labadlali abasakhulayo abatshengisa ukuba bengadlala ngokuzimisela njengalokho bona ababekwenza.

“Bona basasekhona kodwa sebebalutshwana. Ngenkuthazo yethu esibapha yona silakho ukuba sibalolonge baze bavuthwe.”

UChitema usebenza ndawonye loBruce Tshuma kanye loGift Lunga Junior kuqembu leBulawayo City. Bakhangele abadlali abaleminyaka engaphansi kwetshumi lantathu abadlala kuZimbabwe Football Association Bulawayo Province Junior League kanye leqembu labasakhulayo elidlala kuZifa Bulawayo Province Division 2. UTshuma uthi basebenza kuhle kakhulu loChitema.

“Kulula ukusebenza labantu eliyabe lizwisisana ngoba lonke likhuluma ulimi lwebhola njengabantu abadlalayo labo abakwaziyo futhi lokuthi kwakukhulunywa njani ngesikhathi besadlala. Kwenza kubelula ukufikisa umlayezo kubadlali.”

UChitema uqale ukudlala ibhola edlalela iqembu leBulawayo Wanderers, uphinde njalo wadlalela iqembu leMthala wasesiyadlalela iqembu leAmaZulu lapho aphakamise khona isicoco seligi ngomnyaka ka2003. Ngemva kokutshabalala kweqembu leAmaZulu uChitema udlalele iqembu leMonomotapa lakho lapho aphakamise khona isicoco seligi ngomnyaka ka2008. Engakathathi umhlala phansi uChitema udlalele amaqembu abalisa eleZimbabwe Saints kanye lamaqembu asedolobheni leBeitbridge athi eleBorder Strikers kanye leleTown United.

Facebook Forum

XS
SM
MD
LG