Bayakhala abantu abanengi ngedlela uhulumende weZimbabwe owaphatha ngayo uMnu. Heighten Nkomo, owayesaziwa ngegama lokuthi Billy Mzamo ngesikhathi sempi yenkululeko obhubhele emzini wakhe emangweni oweBengu, eGwanda, amaviki amabili edluleyo.
UNkomo ubekwe ngoMvulo emathuneni amaqhawe esizwe eyeNational Heroes Acre eHarare.
UNkomo, obhubhe eseleminyaka engamatshumi ayisikhombisa, wayengomunye wabakhokheli beviyo lebutho leZPRA, uphiwe inhlonipho yeqhawe lesizwe nguMongameli Emmerson Mngangagwa.
Abanye abadlula ezandleni zika Nkomo engumqeqeshi empini bagoqela uMnu. Kembo Mohadi owaye ngumsekeli kaMongameli, umholi wamabutho elizwe aweZimbabwe Defence Forces, uGeneral Valerio Sibanda, kanye loColonel Ossie Olie Mhandu owesifazana wakuqala ukuphiwa isikhundla sokukhokhela abebutho koBulawayo labanye.
Noma labo abasebenza lomuyi bekwamukela ngenjabulo ukuphiwa inhlonipho le, ikakhulu abesifazana ababephansi kwakhe eMkushi Women’s Camp kwele Zambia, abanye njalo basola uhulumende ngokuphatha kubi uNkomo esaphila.
Abachothoza uhulumende bagoqela uMnu. Felix Magalela Mafa, okubandla eliphikisayo eleCitizens Coalition for Change.
“Silembali ebuhlungu ukuthi ubaba uNkomo ngesikhathi seGukurahundi, bamzingela njengomvundla, kodwa namhlanje useliqhawe lamaqhawe ngoba balesiga ukuthi umuntu osefile selungile. Yinto embi leyo,” kutsho uMafa.
UMnu. Mafa uthi ibandla labo lifisa kube labantu ababona ngempilo yamaqhawe besaphila ngoba nxa sebelele akusancedi lutho.
Kodwa uMnu. Believe Gaule, owebandla leZANU-PF, uthi ukuba abantu babelokhe bebuyela emuva lakho akuncedi. Uthi inkulumo eyokuthi uMnu. Nkomo ubehawula akusiqiniso.
“Okwayizolo lokho okwenzakeleyo, asimuveni siyephambili, sivuleni i-chapter entsha according to i-new dispensation. Yikho ubona soku recognizwa amadoda anjengo baba uNkomo. Singakhangela impilo yakhe, ye, lanxa kunjalo, laye waye ngomunye wamadoda eZIPRA. Ubunzima obahlangana lamadoda eZIPRA, laye wahlangana labo.”
UGaule uthi kakulunganga ukuthi abantu basebenzise umbhuqazwe weGukurahundi ekukhankaseni kwabo, ngoba ludaba olubuhlungu kakhulu ebantwini abanengi.