UMongameli Emmerson Mnangagwa uthi akumelanga amalunga ebandla leli athenge amavoti ngesikhathi kudingwa abazangena kudale leCentral Committee.
UMnangagwa utshele umhlangano wedale lePolitburo eHarare ngoLwesithathu ukuba bazajeziswa abazatholakala bethenga amavoti.
Uthe kuzwakala ukuba kulabantu abathenga amavoti abafuna ukukhetho ukuba ngamalunga edale leli. Umhlangano wokukhetha abantu laba uzakwenziwa ngoMgqibelo.
UMnangagwa uthe umuntu wonke ulemvumo yokuncintisa kukhetho lolu kulandelwa isisekelo sebandla leli.
Lokhu kugcizelelwe ngunobhala jikelele webandla leli, uMnu. Mike Bimha, othe phakathi kwabantu abangamakhulu ayisikhombisa lamatshumi amathathu lane - 734 abantu abangamakhulu ayisithupha lamatshumi amane lanye - 641 yibo abazavunyela ukuncintisa.
Ingcwethi kwezombusazwe zithi ukuvulwa kwezikhundla zedale leCentral Committee yeZANU PF kwenzelwa ukuba uMongameli Mnangagwa eguqule ubukhokheli obukhona abeke inkokheli yakhe.
Kulabantu abaphikisa ubukhokheli buka Mnangagwa abathi kangenanga ngamfanelo kulandela ukugequlwa libutho ngomnyaka 2017 kowayengumongameli umuyi uRobert Mugabe.
UMugabe wakhala ezimathonsi esithi ususwe esikhundleni ngenkani. Wabhubha atshe amathe.