amalinks wokungena

Breaking News

UNomsa 'Boyz' Moyo Uthi Akubunjwe Amaqembu Enguqu Azadlala Ilizwe Lingabuyele Kunhlanganiso yeFIFA


Nomsa 'Boyz' Moyo

Owayengukaputeni weqembu leMighty Warriors, uNomsa “Boyz” Moyo, ukhuthaza ukuba kuhlalwe kubunjwe amaqembu awomdlalo wenguqu amela isizwe loba nje ilizwe lisamiswe ukudlala lamanye amazwe.

Uthi uthi kuzakuba nzima ukuba amaqembu abesifazane amela ilizwe leZimbabwe ancintisane lamanye amazwe mhla ezavunyelwa ukuphatheka kumncintiswano eqoqwa ngaphansi kokuqondisa kwenhlanganiso yeFederation of International Football Association (FIFA).

“Ithalenta abalalo (amankazana) litshiyene lethalenta labantu abangabobaba ngoba abantu abangabobaba abanye bazalwa bevele belalo yikho ubathola kwesinye isikhathi bezidlalela ezitaladeni.

“Umntwana oyinkazana angavele ayeqe umnyaka kumbe inyanga ezimbalwa uyabuyela emuva.

Ngakhoke nxa sikhuluma ngokuthuthukisa umdlalo wenguqu kucele labomama sesisalele emuva kakhulu ngoba sizathi sesivunyelwa ukuba siphenduke sizabe sesitshaywa ngokunye okungamaqembu khonalokhu okulokhu kuphatheka kumncintiswano yeCosafa.

Sesibuya thina sizabe sesithwala nzima.”

Uqhubekele phambili esithi inkokheli zomdlalo wenguqu akumelanga zigoqe izandla zilindele ukuthi zizaqala ukulungiselela ukuncintisana lamanye amazwe lapho ilizwe elizavunyelwa khona ukudlala lamanye amazwe.

“Aluba bengasivumela bona abe ZIFA ukuthi siyenze amaqembu abasakhulayo sibe sihlangana mhlawumbe kanye ngenyanga kumbe kabili. Singabumba kungamaqembu ezigaba uthole koBulawayo silamaqembu ethu abasakhulayo sibe sizilolonga kuthi ngemva kwesikhathi sihlangane singqikilane lamaqembu afanayo mhlawumbe aweMasvingo kumbe aweHarare.

Ngaleyondlela siyaphuma lamaqembu amela isizwe aqinileyo ukwenzela ukuba sibe lalapho esiqalisela khona nxa kungathiwa sesivunyelwa ukudlala lamanye amazwe.”

Umqeqetshi oke wasebenza alamaqembu amankazana amela ilizwe, uAnele Nyathi, laye uvemalana laye esithi akumelanga kulindwe ukuba ilizwe lize livunyelwe ukudlala njalo ukuze kubunjwe amaqembu amela ilizwe.

“Kudingakala khathesi ukuba sibe lamaqembu amileyo kanye lemidlalo yezigaba ukuze senelise ukuthi sibone abadlali abangamela ilizwe kwelakusasa. Sibe kwazi ukuba endaweni ethile silomdlali elinje.

Umlandu okhona yikuthi ngalesi sikhathi singadlali imidlalo lamanye amazwe sibe lendlela ezasenza siyale silokhu sikhona emdlalweni.”

Ilizwe leZimbabwe limiswe ukudlala lamanye amazwe yinhlanganiso yeFederation of International Football Association ngemva kokuba inhlanganiso yeSports and Recreation Commission imise umsebenzi inkokheli yenhlanganiso yeZimbabwe Football Association ekhokhelwa nguFelton Kamambo.

Ngenxa yalokho amaqembu aseZimbabwe agoqela lalawo amela ilizwe awavunyelwa ukuphatheka kumidlalo eqoqwe ngaphansi kokuqondisa kweFifa osekudale ukuba livalelwe phandle kumncitiswano eyeAfrica Cup of Nations kanye leyeCosafa.

Ngenyanga kaMpandula bekulomncintiswano weCosafa owamaqembu abesifazane njalo eleMighty Warriors belibukele lingekhaya ikanti ngoMfumfu kuzakuba lomncintiswano weCosafa owamajaha aleminyaka engaphansi kwamatshumi amabili ozaqhutshelwa Eswatini njalo lakho iqembu leYoung Warriors kalisoze libekhona.

Facebook Forum

XS
SM
MD
LG