Lesi yisikhathi sokuthi uLionel Messi loCristiano Ronaldo bedlale emidlalweni yenkezo yeWorld Cup. UKylian Mbappe yena ubuyela emidlalweni le lapho azavezela uzulu indlela ephuzulu adlala ngayo.
Imidlalo le kwele Qatar isimelelwe ngabantu abanengi emhlabeni wonke jikelele.
Kulamaqembu angamatshumi amathathu lambili (32) njalo kuzadlalwa imidlalo engamatshumi ayisithupha lane (64) phakathi kwensuku ezifika phose amatshumi amathathu (29). Le yimidlalo yakuqala ukuba imidlalo yeWorld Cup idlalelwe kuzwekazi leMiddle East.
Imidlalo le iqala ngoLwezi mhlaka 20 egqitshwe mhlaka 18 Mpalakazi.
Nanku okunye okumele likukhangele emidlalweni le.
AMAQEMBU APHEZULU
Brazil (No. 1 in FIFA ranking). Abadlali abalodumo nguNeymar, Vinícius Júnior labanye. Bacina ukuthola inkezo le ngomnyaka ka2002.
Belgium (No. 2). Balabadlali abalithela emambuleni ngendlela ephezuli. Libukele okuzakwenziwa nguKevin De Bruyne.
Argentina (No. 3). Iqembu leli lacina ukuthola inkezo yeWorld Cup kusadlala uDiego Maradona. Lo ngumdlalo wabo wakuqala selokhu kwabhubha uMaradona. Bathembe uMessi.
France (No. 4). Yilo iqembu elaphakamisa inkezo yeWorld Cup emidlalweni yokucina. Likhangele okuzakwenziwa nguMbappé loKarim Benzema. Akulaqembu elanqoba emidlalweni le elandelanayo kusukela ngomnyaka ka1962 kuze kunqobe iqembu leBrazil.
England (No. 5). Iqembu leli kalenzi kahle kulez’insuku. Lilembali ebukekayo emidlalweni le. Ngomnyaka ka2018 langena kusigaba sama semifinals kwathi ngomnyaka ka2021 langena kuma finals enkezo yeEuropean Championship.
ABADLALI ABAPHEZULU
Lionel Messi, Argentina. UMessi sewathola isicoco sokuba ngumdlali ophezulu okufika isikhombisa emidlalweni le. Okwamanje uleminyaka engamatshumi amathathu lanhlanu. Kambe uzakwenelisa na ukuphakamisa inkezo yeWorld Cup? Engakwenza lokhu, uzabonakala njengomdlali olodumo.
Cristiano Ronaldo, Portugal. Usethole inkezo yeEuropean Championship. Kuyala ukuba athole eyeWorld Cup loba esedlale kanenginengi emidlalweni yenkozo le. Useleminyaka yokuzalwa engamatshumi amathathu lasikhombisa (37).
Kylian Mbappé, France. Wadlala okumangalisayo emidlalweni yeWorld Cup ngomnyaka ka2018 eseseleminyaka yokuzalwa elitshumi lasificamunwe munye (19). Udlala okokuthi abanye bathi uphose afane xathu loPele.
Kevin De Bruyne, Belgium. Udlala phakathi laphakathi kwenkundla lapho agijima khona okwamagama ngapha edlalisa ibhola okwethusa amaqembu angqikilana lelakhe. EleBelgium lithemba ukuba uzahamba emidlalweni le eqina saka ukuze abonise ntuthu abakwamanye amaqembu.
Neymar, Brazil. Loba nje ejayele ukukhangelelwa phansi uma edlala eParis Saint-Germain okudlala khona uMessi loMbappe, uNeymar wenza iziga nxa efuna. Ngumdlali owenza izimanga ngebhola.
IDLALWA NJANI IMIDLALO LE?
Kulezibaya eziyisitshiyangalo mbili (8) okulamaqembu amane (4) esibayeni esisodwa. Amaqembu amabili azanqoba azaqhubekela phambili kusigaba somdlalo lo okuyabe sokulamaqembu alitshumi lasithupha (16(.
Kuzadlalwa imidlalo emine ngelanga ekuqaleni kwemidlalo le. Sokusele imidlalo emibili ezibayeni zonke, yonke izadlalwa kanye kanye kusenzelwa ukuba kungaphekwaphekwa impumela yawo.
Akuphunyulwa esigabeni sesibili esama-knockouts esiqala kusanda kugqitshwa imidlalo yezibaya zonke.
Akusoze kubelemidlalo mhlaka 7 Mpalakazi.
IMIDLALO OKUMELE LIYIBUKELE
Qatar vs. Ecuador, Nov. 20. Lo ngumdlalo wakuqala owemidlalo yeWorld Cup.
Argentina vs. Mexico, Nov. 26. Lo ngumdlalo wokuzwana amandla amaqembu aphose avele emazweni angomakhelwana.UMessi uzakwenza njani emidlalweni le?
Spain vs. Germany, Nov. 27. La ngamaqembu aphakamise inkezo yeWorld Cup njalo adlala okumangalisayo emidlalweni yeEuropean leWorld Cup.
Iran vs. United States, Nov. 29. Umdlalo lo kuthiwa yi-The Mother of All Games Part II. Amaqembu la azadlala amazwe awo elwisana kwezombusazwe. Ubudlelwano bamazwe la baphela ngoyaka ka1980.
Ghana vs. Uruguay, Dec. 2. Lisakhumbula ngoNtulikazi 2, 2010? Sokusele imizuzwana ukuba umdlalo wamaqembu la ugqitshwe kusigaba sama quarterfinals, uLuis Suarez walitshi xhaka ngesandla ibhola selingena emambuleni, waxotshwa ngunompembe kodwa umdlali wakwele Ghana wakhutha umbekwa. USuarez weqela phezulu ebona ukuthi uvikela ukuba iqembu lakhe linqotshwe. EleUruguay laqhubekela phambili emidlalweni le. Lokhu kwephula abantu abanengi inhliziyo. Lingaphindisela na eleGhana lonyaka? (AP)