HARARE.................Abohlangothi olubona ngezisebenzi zikahulumende olwe Public Service Commission-PSC bathi uhulumende usazohlawulela imali zama-Bonus kusiya ngokuthi umuntu usebenze njani ngalowo umnyaka.
Kodwa izisebenzi zikahulumende, inengi kungezo hlangothi lwezemfundo zithi akutsho lutho kizo lokho osekusenziwa nguhulumende njengoba zingezihlezi ziphathwa okwezigqili.
Abe PSCZ balobele iziphathamandla ingatsha zikahulumende ukuzazisa ngalelinyathelo besithi lizoqala ukulandelwa kuwonalo umnyaka ka 2022. Kodwa zona izisebenzi zikahulumende zithi kalitsho lutho kizo lelinyathelo likahulumende njengoba zivele zihglezi zitholiswa imali engatsho lutho.
Umkhokheli wenye yenhlanganiso ezikumanyano walezo ezilwela ilungelo lezisebenzi zikahulumende eye-Zimbabwe National Educators Union - ZINEU umnumzana Molvin Dube, upha umbono wabo ngenyathelo eselithethwe nguhulumende.
“Kuqakathekile ukuthi i-Government ibuyele emuva ngendlela vele endulo eyayisenza ngayo i-bonus inika abantu, izisebenzi zayo. Sikhangelele lokuthi izisebenzi, khathesi currently akulamali abayiholayo, bahola far below imali okumele ukuthi bayithole. Okokuthi i-bonus leyo abayinikayo, yes izisebenzi zizakuba lesikhathi sokuthi zithi appreciate khona lokho okuyi-bonus abayabe bekuphiwe. Manje nxa besithi i-salary abayinika izisebenzi inlutshwana baphinde bathi i-bonus abasayifaki futhi. Ngezinye indlela yikuthatha umuntu ogulayo uphinde umsebenzise ilanga litshisa.”
U-Dube uthi sekuyikuxabanisa izisebenzi zakhe nje.
“Sibona ukuthi sebesenza into enxele kakhulu, sikhangela ukuthi isikhathi esesikhona ukuthi i-perfomance yiyo esizakutsho ukuthi umuntu uphiwa njani i-bonus. Sibona lokho kunxele kakhulu, kunxele okokuthi kuzayenza inzondano phakathi kwezisebenzi ezinengi lalabo abayibo abakhokhela ama-departments. Ngoba isikhathi esesikhona, they will fastrack everything ukwenzela ukuthi bathi catch up lesikhathi esifakiweyo. Sesikhangele ukuthi inyanga le esesikiyo ngu October, isisiya emaphethelweni, i-bonus kumele siyiphiwe khathesi ngo-November. Akusela sikhathi sokuthi ungaqalisa ukuthi kuyakhangelwa ama-appraisals lawa ayenzakalayo, angeke vele ancedise ukuthi i-bonus iphiwe.
Enye ingcwethi kwezenhlalakahle kazulu umnumzana Effie Dlela Ncube, owenhlanganiso ebona ngezamalungelo abathengi eye National Consumer Rights Association – NACORA laye uyalisola inyathelo likahulumende.
“Kuyacaca kahle kamhlophe ukuthi uhulumende kazimiselanga ukubhadala ama-bonus kuzisebenzi zakhe, yingakho esephuma lokunye okutsha okokuthi abantu bazabhadalwa ama-bonus ngokuthi basebenze njani kulowo mnyaka. Akusiyonto efaneleyo leyo, bekufanele ukuthi ngabe uyikhulume umnyaka uqala, kungakaze kufike lesi sikhathi lapho osekufanele khona ukuthi abhadale ama-bonus. Yinto engaqondanga, iyephula amalungelo ezisebenzi, engahambisani lamalungelo ezisebenzi avikelwe ngumthetho womhlaba wonke jikelele, avikelwe yi-Constitution yeZimbabwe ngokunjalo. Ngakho ke lokho akufanelanga kwenziwe lonyaka.”
Imizamo yokuthola umbono kahulumende phansi kwenhlanganiso ye Public Service Commission-Zimbabwe ( PSCZ ), yehlule njengoba osaphethe isikhundla sokuba ngunobhala kiyo, u-Dr Edson Badarai, ubengakayiphenduli imibuzo ayithumeleyo ngendlela yokukhulumisana yebulenjini eyeWhatApp njalo engasabeli locingo lwakhe.
Kodwa encwadini esezandleni zeStudio 7, elotshwe yasayinwa ngunobhala wogatsha lwezempilakahle, uAir Commodore (Dr) Jasper Chimedza iqondiswe kubaqondisi bezempilakahle ezabelweni zonke zelizwe ama Medical Directors iveza ukuba bemukele umbiko ovele kuPSC othi amabonus kusukela lonyaka azahalulwa kusiya ngokuthi umuntu usebenze njani.
Facebook Forum