WASHINGTON DC - Ugatsha olubona ngokulotshwa kwemihloliso olweZimbabwe School Examinations Council (Zimsec) luthi kulabafundi abalobe umhloliso weO' Level Maths Paper 1 ngoLwesibili bevele sebethole leliphepha ngudlu babona imibuzo.
Ngokunjalo, lolugatsha luthi iziphathamandla zalo kanye lezogatsha lwezemfundo seziphenya ukuthi lokhu kwenzakale njani zibambisane lamapholisa.
I-Zimsec ithi bakhona abafundi asebebanjiwe abafinyelele leliphepha phambilini kokuloba.
Ixwayise njalo abafundi kanye lozulu ukuthi bengalokothi bathumelane amaphepha emihloliso atholakala ngudlu ngoba lokho kungaphandle komthetho.
Ukutholakala kwamaphepha emihloliso ehlelwe yiZimsec ezandleni zamafundi phambilini kokuloba yinto esivamile kakhulu eZimbabwe ehlala isenzakala phose yonke iminyaka.
