WASHINGTON DC - Umthethwandaba kamantshi walile njalo ngoLwesithathu ukukhulula isiphathamandla sebandla leCCC, uMnu Job Sikhala, ngemali yesibambiso, i-bail.
USikhala selenyanga ezine evalelwe ejele lamanye amalunga eCCC alitshumi lasithupha kulandela ukubotshwa kwabo mhlaka 14 ngoNhlangula besetheswa icala lokuphehla udlakela eNyatsime.
Ibandla leCCC lithi ukuncitshwa kwakhe i-bail kuveza ukuthi imithethwandaba yelizwe isetshenziswa yiZanu PF ukuhlukuluza amalunga alo, okuyinto elandulwa libandla elibusayo.
UmkaSikhala, uEllen, laye umiswe enkantolo ngosuku lunye esetheswa icala lokwephula imithetho yemigwaqo ngokutshayela imota yakhe kucele elingayisilo.
Ulilandule icala esithi amapholisa ambopha ngemva kokwala ukuwafumbathisa, ngokubika kwenkundla yeNewZimbabwe.com. UNkosikazi Sikhala uzaphindela enkantolo mhkala 27 kulinyanga.
Ngakolunye uhlangothi, amagqwetha omkhokheli weCCC uMnu Nelson Chamisa aselobele usikomitshi wamajele ecela imvumo yokuthi uChamisa ethekelele uSikhala labanye bakhe entolongweni kulandela ukwaliswa kwakhe ngonogada bamajele.
Amagqwetha la athi usikomitshi wamajele kumele awaphendule kungakedluli usuku lwakusasa.
Umsekeli wesikhulumeli seCCC uMnu Gift Ostallos Siziba utshele iStudio 7 ukuthi bayakusola kakhulu ukuncitshwa kukaSikhala i-bail. Wengeze wathi bazaqhubeka besenza konke abakwelenisayo ukuze akhululwe ndawonye labanye bakhe.
Kusenjalo, ikhomishini ebona ngokuqhutshwa kokhetho, iZimbabwe Electoral Commission (ZEC), ithi ngoLwesibili ihlangane lamalunga ebandla leZanu PF, eleCCC kanye leleZapu ancintisa kukhetho lwamakhansila eMatobo laseGwanda lapho okube lodlakela khona ngeSonto langoMvulo.
Isikhulumeli salikhomishini, uMnu Jasper Mangwana, uthi batshele abancintisayo laba ukuthi amapholisa asaphenya udaba lodlakela lolu.
Amalunga eCCC athi atshaywe kakubi ngabasekeli beZanu PF. Kodwa abeZanu PF bayakulandula lokhu besithi yibo abatshayiweyo.
Igcwethi kwezombusazwe, uMnu Effie Dlela Ncube, utshele iStudio 7 ukuthi ukuze udlakela luphele, kumele iZEC ichothoze amabandla aludalayo mgceke kungelani lokuthi ngeleZanu PF kumbe yiCCC.
