Iqembu elimela eleZimbabwe emdlalweni kakhilikithi selifinyelele ukungena esigabeni seSuper 12 kumncintiswano wezizwe zomhlaba oqhutshelwa kweleAustralia kulezinsuku.
Ukunqoba okwenze iqembu lamaChevrons iqembu lakweleScotland ngama wickets amahlanu, emdlalweni walo owokucina owesibaya sikaGroup B, yikho okwelenelise ukuth lifinyelela isigaba seSuper 12.
Intathelizindaba yezemidlalo uPraise Dumi Dlakama uthi ukuphenduka kukamqeqetshi uDave Houghton yikho osekudale umehluko omkhulu ekudlaleni kweqembu leZimbabwe lona ebeseliphenduke umthatshuzwa eminyakeni eyedluleyo.
“Sekulengqubela phambili enkulu kakhulu selokhu uDave Houghton eqale ukuqeqetsha iqembu lamaChevrons ngoba ungakhangela indlela abadlale ngayo kulumncintiswano banqobe kabili badliwa kanye.
Lasemdlalweni abadliwa khona ngele West Indies kwakungenxa yamaphutha abo njalo namhla sibonile abeIreland besenza khonokho okwakumele kwenziwe ngabeZImbabwe bayinqoba iWest Indies,” kutsho uDlakama.
Intathelizindaba yezemidlalo uNash Mkokwayarira uthi iqembu leZimbabwe lingabe liphumelele ukuyadlala kusigaba seSuper 12 kodwa kumele lilungisise indlela elidlala ngayo.
“Badlale kuhle sibili kodwa kusiyaphambili kuyamele silungisise ikakhulu kulaba abaqalisa ukutshaya ibhola ngoba singalahlekelwa ngamawickets masinya kungasihlupha phambili ngoba khathesi sesisiyadlala lentshantshu sibili,” kutsho uMkokwayarira.
Kusigaba seSuper 12 iqembu leZimbabwe likusibaya sikaGroup 2 ndawonye lamazwe abalisa eleIndia, Netherlands, Bangladesh, Pakistan kanye leSouth Africa.
Kusibaya sikaGroup 1 kulamaqembu abalisa eleEngland, New Zealand, Australia, Sri Lanka, Afghanistan kanye leIreland.
Amaqembu azaphutsha imidlalo yesigaba seSuper 12 ehlezi endaweni ezimbili eziphezu kwengalane kuzibaya zombili yiwo azadlulela kusigaba esilandelayo esimncintiswano ese semi - final.
UDlakama uthi ukufinyelela ukudlala kusigaba seSuper 12 kuvele bekumele kwenzakale ngoba ilizwe leZimbabwe lingelinye lamazwe akuzinga laphezulu emdlalweni kakhilikithi.
“Sesisiya kuSuper 12 khathesi sesisiyahlangana lezinkulu njalo yikho esizabona ukube sesithuthuke kangakanani ngoba osekusobala yikuthi thina asikho kumaqembu lawa esingathi ngama associate nations kodwa thina silapho kulezi ezinkulu.
Kodwa nxa sikwezinkulu simi ngaphi kwakhona ngoba sesisiyahlangana lamazwe abalisa aboSouth Africa kanye labo India wona angamaqembu amakhulu,” kutsho uDlakama.
Imidlalo yeSuper 12 iqala kusasa ngoMgqibelo lapho eleAustralia elizadlala khona leleNew Zealand.
Iqembu leZimbabwe lona lizadlala ngoMvulo lapho elizadibana khona leleSouth Africa.