Umncintiswano wenguqu owezizwe zomhlaba ukhangelelwe ukuqala ngenyanga ezayo elizweni laseQatar.
Umncintiswano weFIFA World Cup uvame ukuqhutshwa ngenyanga kaNhlangula loNtulikazi kodwa imidlalo yalonyaka izadlalwa kusukela ngenyanga kaLwezi kusiya kuMpalakazi ngoba kubalekelwa ukuba phakathi komnyaka kuyabe kutshisa kakhulu elizweni laseQatar okuyilo eliqoqa limidlalo.
Intathelizindaba yezemidlalo uPraise Dumi Dlakama uthi lokhu sekungaphazamisa limidlalo ngoba idlalwa ngesikhathi imidlalo yeligi isasephakathi laphakathi emazweni amanengi.
“Kukhanya kuzakuba lomehluko omkhulu kakhulu, kunengi okuzakube kutshiyene nxa siqathanisa lemncintiswano eminye eyadlulayo, ikakhulu nxa sikhangela ukuba kuzadlalwa ngesikhathi kuyisizini emazweni aseEurope, eAfrica kanye laseAsia. Ngalokho ke kuzakuba nzima ikakhulu kubadlali ngoba sebengaba banengi abangalimala.
Ngokubona kwami iqembu elizaqhuba kuhle ngelifana lelePortugal lona elilabadlali abanengi abaqhuba kuhle kulezinsuku bedlalela amaqembu atshiyeneyo kuzwekazi laseEurope.”
Omunye laye okhangelele iqembu lePortugal ukuba linqobe nguNgqabutho Gumede.
“Mina ngithanda uCristiano yikho mina ngingowe Portugal. Ngithemba lonyaka iqembu lePortugal lalo lizafika lithathe iWorld Cup. Mina ngingokaCR7.”
Umncintiswano wezizwe zomhlaba uzaqala ngesikhathi iligi yeZimbabwe isifike komlindi uyacina njalo uMuziwakhe Ngwenya uthi njengomlandeli womdlalo wenguqu useqalile ukulungiselela ukuze engaphuthelwa.
“Ngikhangelele ukuthi imidlalo yezizwe zomhlaba leyi izasilethela okokuzilibazisa ngoba uzananzelela ukuthi lapho esivela khona ibhola like lama ngenxa yeCovid 19.
Khathesi khona lokhu ukuthi kule World Cup kutsho ukuba sekukhona esesikukhangelele ukuba kuzakube kusilibazisa njalo ngikhuluma nje ngifuna ukubhadalela i DSTV yami ukuze ngilibukele ibhola.”
USibonakaliso Nleya yena uthi laye uyilindile imidlalo yezizwe zomhlaba kodwa kakakhethi iqembu lokusekela.
“Mina ngizwile sibili ukuthi imidlalo yeWorld Cup iyabe iseQatar kodwa angilaqiniso lamaqembu azaphatheka kuyo.
Ngokuthanda kwami umdlalo wenguqu ngizabukela kuthi ngokuhamba kwemidlalo ngibesengibona ukuba mina ngihamba layiphi.”
Kulamaqembu angamatshumi amathathu lambili azancintisana ngenyanga ezayo kudingwa intshantshu zomhlaba jikelele kusukela zingamatshumi amabili kunyanga kaLwezi kusiya mhla zilitshumi lathobaminwe mbili kunyanga kaMpalakazi.
Iqembu leFrance yilo eliphethe isicoco ngemva kokunqoba elikwenze ngo2018 kumncintiswano oqhutshelwe kweleRussia.
Amazwe azaphetheka kumncintiswano wezizwe zomhlaba lonyaka ngabalisa eleArgentina, Brazil, England, France, Spain, Belgium, Portugal, Germany, Netherlands, Uruguay, Croatia, Denmark, Mexico, United States of America, Senegal, Wales, Poland, Australia, Japan, Morocco, Switzerland, Ghana, Korea Republic, Cameroon, Serbia, Canada, Costa Rica, Tunisia, Saudi Arabia, Iran, Ecuador, kanye labaqoqi bemidlalo ilizwe leQatar.