WASHINGTON DC - Umhlangano wokukhetha inkokheli entsha yeZanu PF, oweCongress, uyaqala namuhla lelibandla lisithi akulamuntu ozancintisana loMongameli Emmerson Mnanggwa esikhundleni sokuba ngumkhokhela walo.
Obona ngokuqhutshwa kwenhlelo zeZanu PF uMnu Obert Mpofu uthi labo abathi umsekeli kaMnangagwa uMnu Constantino Chiwenga ufuna isikhundla lesi bayazikhohlisa.
UMpofu uveze njalo ukuthi umbuthano lo uzaqala ngomhlangano wedale lePolitburo ekuseni namuhla.
Ibandla leZanu PF lithi abazaphatheka kuCongress yalo bazinkulungwane ezintathu ezilamakhulu amahlanu, 3,500, njalo bagoqela iziphathamandla zenhlanganiso zakwamanye amazwe kumbe amabandla ezombusazwe alobudlelwani lalo.
Ekucineni kombuso kaRobert Mugabe, engakagenqulwa libutho, kwaba lokulwisana okukhulu phakathi kwamacele agoqela elalikhokhelwa ngumkakhe uGrace, elikaMnangagwa kanye lelalikhokhelwa nguNkosikazi Joice Mujuru, wonke efuna isikhundla sikaMugabe.
Kodwe kwakungela loyedwa ovumayo ukuthi uyasifuna isikhundla sikaMugabe lanxa nje kwakuzikhanyela.
Olwela amalungelo kazulu njalo ecubungula ezombusazwe uMnu Mbuso Fuzwayo utshele iStudio 7 ukuthi lanxa kungelunga leZanu PF elizancintisana loMnangagwa, bakhona abafuna isikhundla sakhe kodwa abesaba ukuziveza.
