BULAWAYO - USikhumbuzo Banda, umqondisi weqembu lomdlalo wenguqu eleChicken Inn, uthi ukungaziphathi lokungabekezeli sekuphazamise abadlali abanengi abasakhulayo abazalelwe koBulawayo.
UBanda uthi abadlali bakulezinsuku baphanga bekhule amakhanda kungalotshwa ngabo kumaphephandaba.
“Abafana bakhathesi angithi uyakwazi vele bayabe bengasatsheleki. Angaphuma kuphephandaba kabili kathathu ungathi uyamkhuza uyakutshela ukuthi leyi yimali yami. Siyazama ukubaqondisa kodwa bakhona abalalelayo kubekhona njalo abangalaleliyo.
UBanda uthi, "Okungidanisayo kakhulu yikuba abafana bakoBulawayo abaselambeko. Yikho ubona abadlali bakoBulawayo sebebalutshwana abadlala kuPremier Soccer League. Amaqembu amanengi asethatha abadlali abavela phandle ngoba abalapha inengi labo sebevukela utshwala njalo kabala kubekezela. Ungamdingela iqembu elidlala kusigaba sikaDivision One ePlumtree uyakubuza ukuthi bayamupha malini yena engakayi lokuyazilolonga. Bayadanisa abafana bakoBulawayo.”
UBanda udlalele amaqembu abasakhulayo aweqembu leZimbabwe Saints njalo uphiwe ithuba lokuba adlalele iqembu labakhulu nguGibson Homela, esasengumfana oleminyaka engaphansi kwetshumi lathoba minwe mbili.
“Kudala kwakulula ukuba usuke kuqembu labasakhulayo uyedlala kuqembu labakhulu ngoba bonalabana ababedlala kuqembu labakhulu labo babengene ngendlela efanayo laleyo esangena ngayo.
“OMatambanashe labo Innocent Rwodzi babedlala kuqembu labaleminyaka elitshumi lathoba minwe mbili thina sidlala kuqembu labaleminyaka elitshumi lane. Sasibabukela labo besibukela okuyinto eyenza kube lula ukuba basemukele lathi lapho sesihlangana kuqembu elikhulu. Ngokufanayo lathi semukela aboMthulisi Maphosa kanye labo Mtshumayeli Moyo ngesikhathi labo sebesithola ngoba sasivele sihlezi sibazi njalo sibabukela nxa bedlala.”
UBanda uthi abadlali abasakhulayo abakoBulawayo kumele bazifundise ukuyadlala kwamanye amadolobho hatshi ukwala belokhu belinde ukudlalela amaqembu akoBulawayo wodwa.
“Engingakutsho mina engakwenzayo okungaphathisa abafana bakoBulawayo yikuthi mina ngathwala isikhwama ngaqonda eHarare, ngayafunda ukuba abanye abantu baphila njani nxa bengekho ngakibo. Kuqakathekile ukufunda ukuba abanye abantu baphila njani ukuze babe lomqondo ovulekileyo.
“Abafana bakoBulawayo yilo udubo lwabo olokuthi bafuna ukudlala koBulawayo kuphela. Abafuni ukuthwala izikhwama, ungamtshela ukuba usumdingele iqembu eGweru uyala. Bafuna ukutshona bebhoda emalokitshini. Abafani labafana bakwezinye indawo, obathola befika koBulawayo besithi bavela eBindura bezodinga umsebenzi koBulawayo. AbakoBulawayo khonapha ukuthi aye Esigodini uyabe engafuni. Kabathwale isikhwama labo besabalale bayedinga umsebenzi kwezinye indawo.”
UBanda udlalele amaqembu abalisa eleZimbabwe Saints, eleSporting Lions, eleNjube Sundowns kanye leleChicken Inn.
Ekuthatheni kwakhe umhlalaphansi uqhatshwe ukuba asebenze lamaqembu abasakhulayo aweChicken Inn kwathi ngomnyaka ka2013 uqale ukusebenza leqembu labakhulu elidlala kusigaba sePremier Soccer League.