Umkhokheli oweSoweto Parliament, uMnu. Nhlanhla ‘Lux’ Dlamini, owayekunhlanganiso yeOperation Dudula, uthi kumele abadlali abanengi abadlala kuPremier Soccer League kube ngabadabuka eSoweto hatshi abantu bokuza.
Uthe lokhu kuzakhuthaza abafana beSoweto ukuba labo baphatheke emidlalweni yenguqu emkhulu.
UDlamini, okhiphe lawomazwi enkundleni yokuxhumana eyeTwitter, uthi uzaxoxisana ngodaba lolu labanikazi beqembu leOrlando Pirates, eleKaizer Chiefs leSwallows.
Inhlanganiso yeOperation Dudula yaqala isithi ilwela ukuba kuxotshwe abokuza bonke abangela maphepha aqondileyo.
Kodwa ngokuya kwesikhathi, babehamba endaweni ezinengi bezama ukuxotshisa umsebenzi abantu bokuza besithi bathatha yonke imisebenzi.
Kulabanye abantu abasekela okukhulunywa nguDlamini abathi kulungile ukuba labadlali abanengi abadabuka kwele South Africa.
Bakhona njalo abathi uDlamini ukhuluma angakwaziyo.
UMnu. Bongani Mkwananzi, okunhlanganiso yeZimbabwe Community in South Africa, uthi uDlamini ukhulumela abantu ahlala labo.
“Msakazi siyabona i-tweet kaNhlanhla Lux. Mina nxa ngiyikhangele leyo tweet, ikhuluma nje ngokomdlalo wenguqu kubantu base Soweto. So, nxa ungakukhangela nje, akulani lokududula labant bokuza. Lo umuntu uzikhulumela nje yena ngokuthi ma kudlalwa iderby, ngoba ibizwa vele iSoweto Derby ngamaqembu eSoweto ukuthi ukukhangela yena afise ukuthi ngabe inani mhlawumbe sithi five per side ingaba ngabantu abavela khona eSoweto, ngoba lokho kungathuthukisa ibhola eSoweto.
UMkhwananzi uthe, “Ngezwa nje abanye engani sebefuna ukuhlanganisa lokududula, lama-foreigner. Lokhu kuyabe sokuyikuthi nje, ngenxa yokuthi uNhlanhla Lux sowake wakhuluma ngama-foreigners before, soku-associathwa. Kodwa ma uyibuka kahle, i-tweet yakhe ayikhulumi nje ngalokho, izikhulumela nje ngokuthuthukiswa kwenguqu khonale eSoweto.”
UMkhwanazi uthe kufana laye, osekela iqembu le-Highlanders. Ufisa ukubona abadlali bako Bulawayo besetshenziswa okwedlula abakwezinye indawo. Lokhu kwenzelwa ukuthuthukisa abantwana bakuyonale indawo.