WASHINGTON DC - Sokusele insuku ezinhlanu kuphela ukuthi uzulu weMelika ayevota kukhetho lokudinga amalunga amadale womabili ephalamende abalisa eleHouse of Representatives kanye leleSenate.
Ukhetho lolu, olwaziwa ngokuthi ngama-midterm elections, ngolokudinga njalo osibalukhulu bezabelo kanye lezinye iziphathamandla zezabelo ezitshiyeneyo.
Okwamanje ibandla elibusayo elamaDemocrats yilo elilawula amadale womabili, kodwa uphenyo lukhomba ukubana lilakho ukunqotshwa ngelamaRepublicans.
Lanxa kunjalo, abanye bathi akwaziwa okuzawela khona induku loxakuxaku ngoba uphenyo olufanayo soluke lwaveza impumela engaqondanga phambilini kwezinye inketho.
Izigaba ezikhangelwe ngabantu abanengi zigoqela eseGeorgia lapho uSenator wamaDemocrats uMnu Raphael Warnock azangqikilana khona loMnu Herschel Walker owamaRepublicans kukhetho oluzakwenziwa ngeviki ezayo mhlaka 8.
E-Pennsylvania lakho uphenyo luveza uMnu John Fetterman owamaDemocrats engutshiki lobhanqa loMnu Mehmet Oz.
NgoLwesithathu uMongameli Joe Biden wethule umbiko esesititshini sezitimela eseUnion Station, eWashington DC, lapho akhuthaze khona uzulu ukuthi ayevota ngobunengi njalo engaze walalela amaRepublicans akhonona ngokuthi ukhetho alusoze luqhutshwe ngendlela esuthisayo kumbe ekhululekileyo.
UBiden usole udlakela oluphathelane lendaba zokhetho eMelika wathi abantu kumele bavote ngobunengi ukuze bavikele umbuso okhululekileyo, wona athi ulakho ukutshababaliswa ngamaRepublicans.
“Bantu bakithi sisesikhathini esibi,” kutshi uMongameli Biden. “Kumele sikhulume ngazwi linye njengelizwe sisola ukwethuselwa kwabantu kanye lodlakela.”
Uqhubeke wathi, “Umbuso okhululekileyo usengozini ngoba oke waba nguMongameli [uDonald Trump] ulokhe esala ukwamukela ukunqotshwa kwakhe kukhetho olwedluleyo.”
Ukuhlaziya loludaba sixoxe lesizalwane seZimbabwe esihlala eGeorgia uMnu Mbongeni Ngwenya yena othe lanxa zindala zombili Phakathi kukaWarnock loWalker kulesosigaba, ubona uWarnock, oliDemocrat, elakho ukunqoba.
