Abakubandla leZanu PF bathi ngamanga aluhlaza tshoko ukuba batshotshozela udlakela eZimbabwe ngesikhathi ilizwe lilungiselela ukhetho olukhulu oluzakwenziwa ngomnyaka ozayo.
Inhlanganiso yeZimbabwe Human Rights NGO Forum leye Zimbabwe Peace Project zithi liyakhuphuka inani labantu abahlaselwa ngabacatshangelwa ukuba ngamalunga ebandla leZanu PF.
Imibiko eyethulwe zinhlanganiso lezi iveza ukuba udlakela lolu luphehlwa libandla elibusayo loba kulabanye abakumabandla aphikisayo abakhahlameza abakubandla leZanu PF.
Inhlanganiso yeZimbabwe Human Rights NGO Forum ithi izehlakalo zokwephulwa kwamalungelo oluntu kusukela ngoZibandlela kusiya kuMfumfu lonyaka sezifika inkulungwane phose ezimbili – 1,900.
Abakubandla leZanu PF bathi kayisibo abatshotshozela udlakela lwezombusazwe.
UMnu. Freedom Murechu, okubandla elibusayo, uyakusekela lokhu esithi ubudlwangudlwangu abuqondanga
webandla leZanu PF.
Siphinde saxoxa ngodaba lolu loNkosazana Precious Ndlovu, okubandla leCitizens Coaltion for Change ekhokhelwa nguMnu. Nelson Chamisa, othe watshaywa eMatobo ngabantu ababehamba ngezomota zebandla elibusayo.
Kambe ibandla elibusayo litshotshozela udlakela na eZimbabwe? UMnu. Joseph Tshuma, okudale leZanu PF Central Committee, uthi akulabantu abakubandla elibusayo abahlala phansi betshele abatsha ukuthi behlasele amalunga amabandla aphikisayo.
Kodwa uMnu. Nhlanhla Moses Ncube, okunhlanganiso yeFreedom Alliance, uthi ibandla leZanu PF litshotshozela udlakela.