Kumiswe kancane ngeSonto ukuhanjiswa emkhathini kwemitshina yokuthapha isimo somhlabathi, ukukhudumala komkhathi lokunye eZimbabwe.
INational Aeronautics and Space Administration, obekumele ithwale imitshina ye-Zimbabwe satellite kumbe iZimsat 1, ithi kulokunye okuveze ukuba kungalumatha umlilo ku-ng18 rocket, obekumele ithwale imitshina le leminye isuka esabelweni seVirginia eMelika.
I-NASA ithi sokukhangelelwe ukuba irocket le izandiza ngoMvulo iyetshiya imitshina ye-Zimsat-1 leminye emkhathini.
Ingcwethi ezitshiyeneyo eZimbabwe lezakwele Japan zibambisane ukulungisa iZimsat 1, elakho ukusetshenziswa ngabalimi labanye abakhangele ezomkhathi.
Abasebenza lokhu baphansi kwenkampani yeZimbabwe National Geospatial and Space Agency esekolitshini leUniversity of Zimbabwe. EleUganda lalo lilomtshina ofanayo obizwa ngokuthi yiPearlAfricaSat-1.
Eloba enkundleni yokuxhumana eyeTwitter, uMnu. Nick Mangwana, umabhalane omkhulu wohlangothi olubona ngokwethulwa kwemibiko, uthi eZimsat 1 izanceda kakhulu abalimi kanye lokuhlolisisa imikhuhlane etshiyeneyo.
Ukuze sihlaziye udaba lolu, sixoxe loMnu. Robert Ndlovu, ingcwethi kwezobulembu be-internet, othi iZimsat izanceda kakhulu abalimi labakhangela ezomkhathi.
UNdlovu uthe iZimsat 1 ibiza imali ephakathi kwenkulungwane ezimbili zamadola – US$20,000 kusiya kunkulungwane ezingamakhulu amahlanu zamadola – US$500,000.
Kwele Melika kulama satellites amancane – amacubesats, abiza inkulungwane ezilitshumi zamadola kuphela – US$10,000.
EleSouth Africa laba ngelakuqala ukuphanyeka isatellite emkhathini ebizwa ngokuthi yiSunSat 1, eyalungiswa ngababalisi lezifundi ekolitshini leUniversity of Stellenbosch ngomnyaka ka1999.
Amazwe alitshumi lantathu kuzwekazi leAfrica kubikwa ukuba alama satellites atshiyeneyo abhoda emkhathini.