Abahlali beBinga sebephoselana aqatha ngokuthi uhulumende okhokhelwa ngumongameli Emmerson Mnangagwa engabe ethuthukisa ngokuqotho na isigaba sabo kulandela inhlelo ezibalisa ukwakhiwa kwekolitshi leBinga Polytechnic College, inhlelo zokuthiya inhlanzi, izakhiwo, izibholane, imigwaqo kanye lokuqhelisa amagagasi.
Umphathintambo kahulumende obona ngokwenzakala ehofisini kamongameli Mnangagwa, uMnu. Jorum Gumbo ubeseBinga ngoLwesihlanu olwedluleyo okwamalanga amabili ehlola ukuthi inhlelo lezi ziqhutshwa ngemfanelo njalo ubikwa esithi usuthisekile ngazo.
Kodwa omunye umhlali weDobola eBinga uMnu. Tapiwa Moyo usanda ukutshela iStudio 7 ukuthi abantu bakulindawo baphila impilo yakudala kungakabi lempucuko ngoba bakhwela intaba lezihlala nxa befuna ukusebenzisa omakhalekhukhwini njalo abantwana bafundela ngaphansi kwezihlala.
Amazwi akhe aphikiswa kabanzi nguMnu. Kudakwashe Munsaka, ilunga lebandla leZANU PF eBinga yena othi ngempela kulentuthuko kuleyondawo.
Abanye abalaleli beStudio 7 bathukuthela ngamazwi kaMnu. Munsaka besithi bazibonela ngawabo ukuthi akulantuthuko.
Asizweni abanye babo.
Kodwa uMnu. Kudakwashe Munsanka uthi uma ngamazwi akhe. Asizweni amazwi asithumele wona nge whatssup ngemva kokuzwa abalaleli.