WASHINGTON DC - Akukakhanyi kuhle ukuthi yiliphi ibandla elinqobileyo kukhetho lokudinga amalunga amadale womabili ephalamende yaseMelika abalisa eleHouse of Representative kanye labosibalukhulu bezabelo ngoba amavoti asabalwa.
Kodwa ibandla eliphikisayo elamaRepublicans yilo elikhokhelayo ngezihlalo ezingamakhulu amabili, 200, kuHouse of Representative, kuthi ibandla lamaDemocrats lona selithole izihlalo ezilikhulu lamatshumi ayisikhombisa lane, 174, kubike iAP.
Ingcwethi zithi amaRepublicans akhanya ezanqoba ahluthunele amaDemocrats lelidale.
Kudale leSenate khona amabandla womabili asethole izihlalo ezilinganayo; ezingamatshumi amane lasitshiyangalombili, 48, ngalinye.
Kulezihlalo zeSenate ezine eziseleyo lapho okusabalwa khona amavoti, ezibalisa eArizona, Georgia, Nevada, leWisconsin. Abancintise bemele amabandla womabili kulezizigaba bangutshiki lobhanqa.
Esigabeni sePennysilvania, obekubusa khona amaRepublicans, uMnu John Fetterman, owamaDemocrats unqobe uMnu Mehmet Oz owamaRepublicans.
Esigabeni seGeorgia khona ukhetho lweSenate lubikwa lulakho ukuphindwa, i-run-off, ngoba kukhanya kungela ozathola amavoti ahlelwe ngumthetho.
Omunye wabavote izolo ohlala eTexas uMnu Raphael Mthombeni utshele iStudio 7 ukuthi laye ngokubona kwakhe, amaDemocrats azanqoba kuSenate kuthi amaRepublicans wona athathe iHouse of Representatives.
