UMayfield, indodana kamqeqetshi osewadlula emhlabeni uBarry Daka, ugijimisa iphupho elokungenisa iqembu abaliqale lomuyi uRichard Choruma kusigaba sikaDivision One
UDaka uthi iqembu leMzilikazi baliqale ngemva kokunanzelela ukuba abadlali bomdlalo wenguqu banengi kakhulu emalokitshini abalisa eMzilikazi, Makokoba, Barbourfields kanye leNguboyenja njalo abanye babo bacina beswele amaqembu awokudlalela.
“Uhlelo lwethu lolu ngolokukhulisa abafana abaleminyaka elitshumi lesithupha kusiyaphezulu. Sibapha ithuba elokuba bekhule emdlalweni wenguqu ikakhulu nxa befuna ukuphila ngokudlala ibhola. Iqembu lethu yilo elihlezi phezu kwengalane yemiklomelo njalo sikhangelele ukuba sinqobe siyedlala kusigaba sikaDivision One.
Lokhu kungaba ngokwakuqala ukuba iqembu leMzilikazi likwenze ngoba kuvame ukuba abadlali abaphuma eMzilikazi bedlalele amaqembu abalisa eleHighlanders, eleChicken Inn kanye leleBulawayo Chiefs. Inkinga manje abadlali banengi abaphuma eMzilikazi yikho sesisipha ithuba labo abangayenelisi ukudlala kulawo maqembu ithuba elokuba bazodlala ngapha.”
UDaka uthi ngaphandle kokupha abadlali ithuba, bahambisa abanye babo emazweni angomakhelwane.
“Lokho siyakuzama sisebenzisana labanye abaphandle kwelizwe ukuthi sihambise abanye abafana. Okwakhathesi besihambise abathathu kweleBotswana njalo silinde elinye ithuba ekuqaleni komnyaka ozayo ukuba sihambise abanye. Abanye babo kulamaqembu adlala kusigaba sePremier Soccer League, kanye lalawo asethole ilungelo elokuyadlala kusigaba saphezulu, aseke abuza ngabo. Luhlelo oluqhubekayo njalo luqale ngo2017 ngilomuyi uRichard Choruma njalo lanamhla lokhu silokhu sikhulisa iphupho lakhe.”
UDaka uthi iqembu leMzilikazi nxa lingaphumelela ukuyadlala kusigaba saphezulu, lizabe lizaludinga usekelo oluvela emphakathini ngoba indleko zingabakhama.
“Inkinga enkulu esilayo ngeyosekelo lwemali, asilalo. Ngomnyaka ozayo lapho esiyakhona ku Division One kuzakuba nzima ukuthi sidlale ngoba kuyabe sekufunakala imali enengi kakhulu. Siyacela emphakathini ukuba labo abayenelisayo kababuye bezosibukela njalo belandele ikhasi lethu ebulenjini bohlobo lweFacebook ethiwa Mzilikazi Football Club ukuze babone ukuthi siyenzanjani.”
Uqhubekele phambili uDaka wathi bengenza izimanga nxa bengathola usekelo lwemali.
“Ngokubona kwami nxa singathola usekelo lwemali singakhupha abanye aboPeter Ndlovu, oAdam Ndlovu, oMercedes Sibanda, oMuzondiwa Mugadza, oRichard Choruma, oZenzo Moyo kanye labanye abadlali abake badla ubhedu.
Usiko lwethu lokudlala ibhola lukhona kubantwabethu njalo asifuni ukuba silubulale usiko lwethu lwaseMzilikazi, Makokoba, Nguboyenja kanye leBarbourfields.”
Ngesikhathi esadlala uMayfield udlalele amaqembu abalisa eleRailstars kanye leleHighlanders njalo ekuthatheni kwakhe umhlalaphansi ube yimeneja yamaqembu abalisa eleRailstars kanye leleBantu Rovers.