amalinks wokungena

Breaking News

Balutshwana Abakhwabitha Umcintiswano Womdlalo Wenguqu Walonyaka oweWorld Cup


FIFA World Cup Qatar 2022

Umncintiswano wenguqu owokudinga intshantshu zomhlaba wonke jikele ukhangelelwe ukuqala ngeSonto elizweni lase Qatar kodwa balutshwana abantu abazwakala bekhuluma ngawo edolobheni lakoBulawayo.

Umlandeli womdlalo wenguqu, uWashington Sibanda, uthi isikhathi umncintiswano wezizwe zomhlaba ozadlalwa ngaso yiyo imbangela eyokuthi kukhanye angathi abantu abalantshukuntshu lawo.

“Nxa sikhangela ukuba lonyaka imidlalo yezizwe zomhlaba izadlalwa kusukela kunyanga kaLwezi kusiya kuMpalakazi yisikhathi esingajwayelekanga. Limidlalo ivame ukudlalwa ngoNhlangula loNtulikazi njalo ngalesisikhathi kuyabe kuvele isizini isiphelile emazweni amanengi. Khonokho bekusenza abantu babe beliwomele ibhola kodwa khathesi sesisiya kuMpalakazi njalo abantu kunengi abakucabangayo ngoba yisikhathi sokukholisa.

"Phezu kwalokho besiphakathi kokubukela okwenzakala kubo English Premier League okutsho ukuba abantu bebevele sebezikholisela khonale okwenza kube nzima ukuba abantu bacabange ngemidlalo yezizwe zomhlaba. Ngokubona kwami khonokho kwenze ukuba abantu bakhanye angani kabalandaba lemidlalo yezizwe zomhlaba.”

Othengisa impahla zemidlalo, uDaniel Bingadadi, uthi lonyaka akuthembisi ukuba engenza imali ngokuthengisa amakawuso amaqembu azaphatheka emidlwlweni yeWorld Cup.

“Khathesi asilawo amakawuso ngoba akulabantu abakade bewadinga. Akufani langomnyaka lapho imidlalo yezizwe zomhlaba eyaqhutshelwa khona kwele South Africa lapho abantu ababetshengisa ukuba lentshukuntshu ngemidlalo yakhona.”

UKeith Tsapi yena uthi imbiko eyokuba kulabantu abagqilazwe ngesikhathi kusakhiwa inkundla khonale kwele Qatar kanye leyokuba kulemithetho encindezela amalungelo abantu lakho kudale ukuba abathandi bomdlalo wenguqu bangabi lothando lemidlalo yalonyaka.

“Imidlalo yezizwe zomhlaba leyi ihlupha ngendaba zamalungelo abantu. Ngale kuleliya lizwe kunengi okungavunyelwayo. Phezu kwalokho kulendaba zokuba abantu abadabuka kuzwekazi laseAfrica bebegqilazwa esezikhulunywa khathesi sekusele insuku ezimbalwa ukuba imidlalo iqale. Ngitsho loSepp Blatter laye usesithi kwaba liphutha ukuba kudlalelwe eQatar. Khonokho sekwenze ukuba abanye abantu abakade bengaya khonale babe lokwesaba ngoba besesaba ukuvalelwa ejele okweminyaka ethile ngoba sebeyenze izinto abakade bengazi ukuba kazivunyelwa.”

Intatheli yezemidlalo, uThandiwe Moyo, uthi usekela wonke amaqembu amele izwekazi laseAfrica njengoba eleZimbabwe lingekho kulumncintiswano.

“Siyayibona iyeza imidlalo yezizwe zomhlaba njalo njengabomama sesizathathelwa ama remote. Kungasenani sifisela okuhle amazwe aseAfrica. Bonke laba esibabukela kubo English Premier League abadabuka kuzwekazi leAfrica sithi sekuyisikhathi esokuthi basimele sonke njalo sibafisiela inhlanhla.”

Osebenzela ehofisini yeqembu leBulawayo City njalo engumlandeli weqembu leManchester United uSihle Nyathi yena uthi uzasekela loba yiliphi iqembu elilabadlali abadlalela iqembu leManchester United.

“Sikhangelele amaqembu aseAfrica kodwa mina futhi ngithanda iqembu leBrazil njalo ngiyabe ngikhangele uFred. Ngingathi nje bonke abadlali abadlalela iqembu leManchester United ngizabe ngilandela imidlalo yabo.”

Intathelizindaba yezemidlalo uLovemore Dube uthi lonyaka amaqembu aphuma kwele Africa lawo alalo ithuba elokuqhuba kuhle kumncintiswano walonyaka.

“Ekudlaleni lapha ngibona angani ngumncintiswano ovulekileyo ngoba eminyakeni eyedluleyo bekunqoba ilizwe elivelela kuwonalowo mhlubulo womkhathi. Singakhangela kwele Qatar kuabe kutshisa bhe. Lokhu kuzakupha ithuba amazwe aseAfrica afana laboMorroco, Tunisia kanye laboSenegal elokuba bengathwali nzima yisimo somkhathi lesi esiyabe sitshisa bhe.”

UBonweyinkosi Sithole yena uthi okunye okuzathwalisa abantu nzima yizikhathi okuyabe kudlalwa ngazo khonale eQatar.

“Ngingazi ukuthi izikhathi sizasivumela yini ngoba ngibona angathi kuzabe kudlalwa ebusuku kakhulu. Lokhu kuzadinga ukuba abantu bavuke ebusuku bebukele ibhola okuzakwenza sibe siwozela emisebenzini. Ngaphandle kwalokho ngibona angani ngumncintiswano ozakuba mnandi ngoba abadlali abanengi ababkhethwe ngamaqembu amanengi ngabadlali abavele besidla amalangabi. Ungakhangela eNgilandi kulabadlali abafana labo Bukayo Saka, oDeclan Rice kanye laboMason."

Imidlalo yezizwe zomhlaba eyeFIFA World Cup izaqala ngesonto mhla zingamatshumi amabili njalo ikhangelelwe ukufika emaphethelweni mhla zilitshumi lathoba minwe mbili kunyanga kaMpalakazi.

Facebook Forum

XS
SM
MD
LG