UNathan Lemekhani Nyirenda, odabuka kwele Zambia obefunda kwele Russia lapho abevalelwe khona entilongweni, usebulewe empini kwele uKraine.
Abezindaba abeAssociated Press babika ukuba eleZambia lidla amalahle ngoba uNyirenda wayevalelwe entilongweni.
Akwaziwa ukuba wangeniswa njani kubutho lakwele Russia.
UNyirenda wavalelwe entilongweni okweminyaka ayisifincamunwemunye kulandela ukutholakala kwakhe ngomnyaka ka2020 elezidakamizwa.
UMnu. Stanely Kakubo, ophethe uhlangothi lukahulumende olubona ngokudlelana lamanye amazwe, uthi eleRussia lababikela mhlaka 9 Lwezi ukuba uNyirenda wafela empini kwele Ukraine.
UMnu. Kakubo uthi, “EleZambia lifuna ukuba kwazi ukuthi odabuka elizweni leli owayesaziwa esentilongweni wahamba njani empini kwele Ukraine njalo wabulawa ngubani, sekutheni.”
Kubikwa ukuthi isidumbu sika Nyirenda, owabulawa mhlaka 22 Mpandula, sathwalelwe eRostov kwele Russia kusenzelwa ukuba sihanjiswe eZimbia.
UNyirenda wayefundela ukusetshenziswa kwe-nuclear eMoscow Engineering Physics Institute engakabotshwa.
Kubikwa ukuba eleRussia elithwele nzima kwele Ukraine ladinga izibotshwa ezinengi lazihambisa empini le lisithi abazakwenza lokhu bazakhululwa masinyane.
UMnu. Yevgeny Prigozhin, okhokhela inkampani yeWagner Group elolonga abafisa ukungena kubutho emazweni adlelana lele Russia, waphuma kumabonakude esithi izibotshwa ezifisa ukuya kulwa kwele Ukraine zimele eleRussia zizakwephulelwa isikhathi sokuvalelwa entilongweni.