amalinks wokungena

Breaking News

Ibandla leZanu PF Lithi uJonathan Moyo loPatrick Zhuwao Balelungelo Lokubuyela Kubandla Elibusayo


UMnu. Tafadzwa Mugwadi

Ibandla leZanu PF lithi uSikhwicamfundo Jonathan Moyo loMnu. Patrick Zhuwao, abacela ukuxolelwa libandla leli kulandela ukudlelana kwabo lamabandla aphikisayo bekucele leGeneration 40 kubandla elibusayo, bathi ababili laba bayakwazi okumele bekwenze uma befisa ukubuyela kulo.

UMoyo loZhuwao balobe ingcwadi ejulileyo izolo bexolisa ngabakwenza ngesikathi kusabusa owayengumongameli uMnu. Robert Mugabe, owagenqulwa libutho iGeneration 40 isekela umkakhe, uNkosikazi Grace Mugabe, owayefisa ukuthi kungene umuntu amsekelayo esikhundleni sakhe.

Umqondisi wezemibiko webandla leZanu PF, uMnu. Tafadzwa Mugwadi, uthi bayalincoma kakhulu inyathelo elithethwe ngababili laba kanye lesibindi sokuthi balobe incwadi bexolisa kulokho kuhlamuka abakwenzayo. Uthi kumele benze konke okufunakalayo uma befisa ukubuyela kubandla elibusayo.

“Kunzima ukuthi ngitsho ukuba bazokwemukelwa yini loba hatshi njengoba lingcwadi ingaqondiswanga kulabo abalamandla wokulawula phezu kodaba lwabo.”

UMugwadi uthi uMongameli Emmerson Mnangagwa ukhuthaza abantu bonke abaphumayo labafisa ukungena kubandla leZanu PF ukuthi bebuye ngobunengi babo.

“Kodwa lokho kumele kube ngokwenziwa beqinisile njalo kungokuzosiza ekuthini ibandla likhule. Kodwa ma ngiyikhangela lingcwadi, ngiyibona ingefuna okuthize khona ebandleni leZanu Pf, angikholwa ukuba yiyona ndlela okumele abanye bethu laba babuyele ngayo.”

Esinye isiphathamandla ebandleni leZanu PF leli, uMnu. Joseph Tshuma, upha umbono wakhe laye phezu kwaloludaba.

“Inhlanganiso yethu yeZanu PF, yinhlanganiso evumela umuntu wonke, yisikhwama esingena wonke umuntu ofuna ukungena phakathi kwaso, akhudumale phakathi ngfoba kwesinye isikhathi ungaphuma phandle, kusuka kuqande kubethe umoya ongajwayelekanga. Hayi, kuhle kakhulu okwenziwe ngamadoda lawa, siyakuncoma kakhulu njalo sithi khona siyamukela ukuba bazabuya sisebenze kuhle enhlelweni zonke eze Zanu Pf njengoba nje silibandla elivuleke umngqondo, ibandla elifuna ukwenza lokho okuthiwa ngesiNgisi yi-engagement le re-engagement.”

UMoyo, uZhuwao loMnu. Savior Kasukuwere babaleka eZimbabwe sebegonjolozelwe libutho elalisithi benza okungekho emthethweni. Abanye babo ababekucele leG40, baqoqela uMnu. Ignitius Chombo. Kukhanya engani babefisa ukuba uMnu. Sydney Sekeremai angene esikhundleni sikaMugabe, owayesekhulile.

Abanye abaphikisayo bathi kulungile okwenziwe nguMoyo loZhuwao kubelabanye abakusolayo lokhu. UMnu. Felix Magalela Mafa, okubandla leCCC, uthi balelungelo lokwenza abakufunayo.

“Ngoba phela siyafundiswa ngabazali ukuthi umbuso ngamazolo, ungathi ubusa uphathe abanye abantu ungani zinyamazana, kusasa kuzabuya u-Pharoah ongazi uJoseph, uzacina lawe ususidla imbuya ngoluthi. Hayi, uJonathan loZhuwao, siyabafisela inhlanhla njalo balelungelo ukuzikhethela ama-party lama-church abawafunayo.”

UMnu. Rejoice Ngwenya, ingcwethi kwezombusazwe, uthi akwaziwa ukuba abantu laba baxolisa kubani.

“Nxa umuntu eyindoda ephambanisile kodwa eyenze into eqondileyo, akudingi ukuthi axolise. Baxolisa ngoba baphambanisani?. Kabaphambanisanga lutho, ngoba uhulumende kaRobert Mugabe wakhitshwa ngodlakela. Sokutshengisela ukuthi ngeSikhiwa, kabala ma-principles. Singazi ukuthi okwakhathesi, sesimelele khona ukuzwa ukuthi hayi bazabizwa, kube lidili elikhulu. Sebetshengisela ukuthi kabala mgogodla.”

UMnu. Ashley Pfunye, eyinye njalo ingcwethi kwezombusazwe, uthi akuqakathekanga okucelwa nguMoyo loZhuwao.

“Siyakubona ukuthi kabalani le-National Governance, yikho bona baphuma besithi, babona i-violence, babona ama-violations of human rights, bekhuluma izinto esasivele sikhuluma ngazo. Kodwa lamuhla sebuyela but thina sithi akulanto entshintshileyo, in terms of governance, actualy izinto sezikhulile, ama-prices ama-commodities, kuyadula, akuselanhlalakahle eZimbabwe.”

UMnu. Michael Mpala, ohlala eHarare, uthi ukwenza kwababili laba kuyindlela nje yokuzwisa ubuhlungu umkhokheli weCCC.

“Ngoba, singakhangela inyanga eziphelileyo lezi, laba bantu bebengani abahlangani laye, abazwanani ezintweni akade beziyenza, bengani bayahlaselana njalo bayathethisana kumbe bayasolana kuTwitter. So lapha ngezinye indlela, yindlela zokumtshengisa ukuthi yena abalandaba laye. Kumbe bafuna ukumtshengisa ukuthi i-party yakhe entsha yeCCC ayifomayo, ayisoze iye ndawo. Ngezinye indlela sebefuna ukuyiqeda sibili i-party leyi.”

Akwaziwa ukuba uKasukuwere uzacela laye uxolo kubandla elalifuna ukumsusela amanqe. Kwaba lokuxokozela okumangalisayo ngesikhathi uMugabe esuswa esikhundleni libutho ngomnyaka ka2017.

Facebook Forum

XS
SM
MD
LG