UMongameli Emmerson Mnangagwa namuhla unike izabelo ezitshiyeneyo amabhasi afika phose amatshumi amabili -18, ngesikhathi eleZimbabwe lilungiselela ukhetho oluzakwenziwa ngomnyaka ozayo.
Esethula uhlelo lwamabhasi lolu oluzaphathisa izisebenzi zikahulumende, uMnangagwa uthe kumele abantu bevotele ibandla lakhe ngoba laye useqine saka kulandela ukufakelwa kwakhe itshefu eGwanda ngomnyaka ka2017 kusabusa oweyengumongameli, uRobert Mugabe.
Iphephandaba leChronicle libika ukuba uMnangagwa uthe okwamanje ubona engani uzaphila okwesikhathi eside kulandela ukufakelwa kwakhe itshefu yilabo ababengafuni ukuthi angene esikhundleni sika Mugabe, owagenqulwa libutho ngoLwezi ngomnyaka ka2017. Kubikwa ukuba wafakelwa itshefu ku-ice-cream eyayihluzwe epulazini lika Mugabe.
UMnangagwa uphinde wavula okusemthethweni umgodi omutsha eBlanket Mine, ozakwenza ukuba inkampani le yembe igolide elinengi.
UMnu. Joseph Tshuma, olilunga lebandla leZanu PF, uthi luyabukeka uhlelo lwamabhasi lolu, oluphathelane lezisebenzi zikahulumende.
uMnu. Thandeko Zinti Mnkandla, olandela ezombusazwe, uthi kuyamangalisa okwenziwa libandla elibusayo.