amalinks wokungena

Breaking News

Iyaqala Imidlalo yeFiFa World Cup eQatar ngeSonto


BULAWAYO - Umncintiswano wezizwe zomhlaba, oweFIFA World Cup 2022, uyaqala ngeSonto kweleQatar abalandeli bomdlalo wenguqu eZimbabwe besithi bayimelele ngabomvu limidlalo.

Umncintiswano lo uzasungulwa ngomdlalo wesibaya sikaGroup A ophakathi kweQatar leEquador enkundleni yeAl Bayt. Lo yiwo wodwa umdlalo okhona kusasa.

NgoMvulo kulemidlalo emithathu. Iqembu leSenegal lizadibana leleNetherlands kumdlalo wesibili okaGroup A. Ngosuku lunye, kuzangqikilana njalo amaqembu akusibaya sikaGroup B abalisa eleEngland lona elizabhuqana leleIran kuthi eleUnited States of America liqwaqwazane leleWales.

Izwekazi leAfrica limelwa ngamaqembu amahlanu kuWorld Cup abalisa eleSenegal, Cameroon, Ghana, Morocco kanye leTunisia.

Abalandeli benguqu eZimbabwe bathi bazadanela kulawa maqembu njengoba iqembu lamaWarriors lingekho kuWorld Cup le.

Kodwa abanye bathi basekela amazwe aphetsheya alabadlali abenza izimanga afana leBrazil, France, iGermany lamanye.

Umdlali weBrazil uNeymar ukhona laye kuWorld Cup.
Umdlali weBrazil uNeymar ukhona laye kuWorld Cup.

Abasekela amaqembu atshiyeneyo bathi badane kakhulu ngoba abanye abadlali abazintshantshu abafana lomgadli weSenegal odlalela iqembu lakweleGermany, eleBayern Munich, uSadio Mane, kanye loChristopher Nkunku bengasoze babekhona kulimidlalo ngoba belimele.

Umlandeli wenguqu uEmmanuel Sibanda uthi udane kakhulu ngokulimala kwababili laba.

“Ukulimala kukaNkunku kulakho ukumphambanisa kakhulu ngoba phela imidlalo yezizwe zomhlaba ibuya kanye eminyakeni emine njalo abadlali bayabe beyikhangelele,” kutsho uSibanda.

Odlalela iqembu elikusigaba seBulawayo Province Division 2 eleToronto, uPrince Mpofu, laye uthi ubekhangelele ukuba uNkunku uzakwenza izimanga kumncintiswano walonyaka ngemva kokudlala kuhle kuqembu leRB Leipzig eminyakeni edluleyo.

Umdlali weFrance uChristopher Nkunku ungomunye wabadlali abalimeleyo abangasoze baphatheke kumidlalo yeFifa World Cup.
Umdlali weFrance uChristopher Nkunku ungomunye wabadlali abalimeleyo abangasoze baphatheke kumidlalo yeFifa World Cup.

“Nxa ngikhuluma ngoChristopher Nkunku ngikhangela ukuthi ukulimala kwakhe kube kubi ngoba ngomunye obekhangelelwe ukwenza kuhle kulumncintiswano ngemva kokudlala kuhle akwenze kuqembu lakhe eleRB Leipzig kuBundesliga,” kutsho uMpofu.

“UMane ukungabi khona kwakhe yinto enkulu kakhulu ngoba phela ngomunye wabadlali ababili abadlala kuhle emhlabeni jikelele.”

Omunye njalo umdlali wenguqu uBrendon Tshuma, uthi: “Mina ngibona angathi ukungabi khona kwalaba abaziwa umhlaba wonke kuzakupha ithuba kubadlali labana abakade bekhangelelwa phansi.

“Kuzabanika ithuba elokuba batshengise ikhono labo njalo labalandeli bomdlalo labo bazabona abadlali abakade bengazi ngabo.”

Abanye abadlali abalodumo abangasoze bephatheke kumidlalo yeWorld Cup loba nje amazwe abo eyingxenye yalumncintiswano babalisa uPaul Pogba kanye loN’Golo Kante abeFrance, uDiogo Jota owasePortugal kanye loRecce James owaseNgilandi.

please wait

No media source currently available

0:00 0:02:56 0:00

Facebook Forum

XS
SM
MD
LG