Kuliviki, kuhlelo lwethu olwe-Diaspora Profile, lapho esixoxa lezizalwane zeZimbabwe esezihlala kwamanye amazwe siloMnu. Cecil Sibanda, owakha isikolo se-Secondary, emangweni we-Mzingwane, e-Zansi yemaNdebeleni esithiwa yi-Mlomotsha School of Excellence.
Isikolo lesi esisungulwe ngoZibandlela ka2022, silabafundi abangaba ngamatshumi amane - 40, abaku-Form-1. USibanda uthi izifundo ziqhutshwe kuhle lonyaka, njalo ngomnyaka ka2023, sebehlele ukusungula i-boarding, okutsho ukuthi abanye babantwana abavela khatshana, bazakhona ukufunda behlala esikolweni.
Labo abafisa ukusa abantwana kulesi sikolo uSibanda uthi kasiduli kangako njengezinye izikolo ezingekho phansi kukahulumende, ezibizwa ngokuthi ngamaPrivate Schools, ngakhoke abazali kabakhululeke ukuzokhulumisana labo ukuze abantwababo bangene kuhlelo olweBoarding School abakhangelele ukuluqala ngomnyaka ozayo oka2023.
USibanda uthi lesi sikolo savele sasungulwa ngenjongo yokuphathisa abantwana balumango abahamba umango omude besiya esikolweni eseSecondary eseduzane ese Mzinyathini Secondary School. Uthi emangweni adabuka khona eTshalimbe, kule primary school kuphela.
"Sikhula banengi abacina bebanjwa ngamandla ukungaqhubeki ngezifundo ngoba kwakuhanjwa amakilometer edlula amatshumi amabili-20km ukuya kuSecondary sibalutshwana esaqinisela ukuhamba lumango sitshazwa ngumqando kanye lokutshiswa lilanga sisiya esikolo, kutsho uSibanda.
Okuyikhona okwamfuqa ukuthi akhe lesi sikolo ukuze abanamhla abantwana bengabhekani lodubo lunye ababhekana lalo bona bekhula. Olunye udubo ababhekana lalo yikuthi iMzinyathini ngaleso sikhathi yayingela Form 6 ngakhoke eMlomotsha School of Excellence bahlela ukuthi kube lalezi zifundo zikaForm 6, kuqalisela kubonalaba abantwana abaqale uForm One lonyaka.
Uphethe ngokuthi uyabonga izakhamizi ezisebenza laye ukuba babe lendawo elemfundo elohlonzi, kanye lababalisi abaqhuba kuhle umsebenzi wabo.