EleZimbabwe linanza usuku lokusayinelana isivumelwano sokubambana eseUnity Accord ngomnyaka ka 1987 phakathi kwebandla lePF ZAPU elalikhokhelwa nguMnu. Joshua Mqabuko Nkomo leleZANU PF elaliholwa nguMnu. Robert Mugabe.
Inengi lithi isivumelwano lesi saletha ukuthula ngoba samisa ukubulawa kwabantu ngesikhathi seGukurahundi eMatabeleland leMidlands.
Kodwa uMnu. Sibangilizwe Nkomo, indodana kamuyi uMnu. Joshusa Nkomo, onguye osekhokhela ibandla leZAPU uthi injongo yeUnity Accord ayifezwanga.
Siphinde saxoxa lelunga lebandla leZANU PF uMnu. Malaki Nkomo othi kunengi okwafezwa yisivumelwano seUnity Accord.