UMongameli Emmerson Mnangagwa ongumkhokheli webandla elibusayo eleZANU-PF wethule uluhlu lwamalunga abumba idale laphezulu lebandla lakhe ele-Politburo lapho engeze khona amanye amagama abantu abakade bengekho kulo.
Amalunga la, agoqela labo abakade bevele bekukhomithi le, labanye abakade sebalahlelwa emsamo asebephendukisiwe, labalutshwana abatsha.
Abacubungula ezombusazwe bathi lokhu kuveza ukuba uMnangagwa uzimisele ukumanyanzi amaxuku adonselanayo kuleli bandla ngaphambilini kokhetho lomnyaka ozayo.
UMnangagwa uqale ngokwethula amagama abasekeli bakhe kubandla, ommnumzana Constantino Chiwenga loKembo Mohadi kanye lomgcinisihlalo webandla uNkosikazi Oppah Muchinguri Kashiri, ababuyisele ezikhundleni abakade bevele bekizo.
Abanye ababuyiselwe ezihlalweni zabo ku-Politburo bagoqela UMnu. Obert Mpofu ongunobhala, umkakhe uNkosikazi Auxillia Mnangagwa, ozabona ngokwezethekeli lezemvelo, uNkosikazi Mabel Chinomona, obona ngezabesifazane, uTino Machakaire obona ngezabatsha, usomlomo wedale lephalamende UMnu. Jacob Mudenda ophiwe isikhundla sokubona ngezomthetho esasibanjwe nguMnu. Paul Mangwana, yena osezakubona ngezokwemba.
Kulabo asebebuyiselwe ku-Politburo bevela emsamo, bagoqela uMnu. Webster Shamu, ozasekela umqoqi wenhleleo zebandla, uDeputy Political Commissar, UMnu. James Makamba owake wavinjwa ukuncintisela isihlalo sikamgcinisihlalo we-Mashonaland Central ophiwe isikhundla sokusela obona ngezokuthwalwa kwempahla, loMnu. Supa Mwandiwanzira ozabona ngezezabelo.
Ocubungula ezombusazwe uMnu. Joseph Tshuma engelinye lamalunga e-Central Committee yalelibandla, uthi i-Politburo le ikhombisa isifiso sikaMnangagwa esokubambanisa ibandla lokuqhubekisela phambili inhlelo zokuqeqetsha lokulolonga abatsha kwezombusazwe.
"Siyabona bakhona abanye abantu abatsha abangenileyo ku-Politburo; labanye abadala abaqhubeke belokhe bebambe izikhundla zabo abebevele belazo. Khonokho yikho okutshengisela into esiyibiza ngesiNgisi sithi yi-continuity, ngapha soku-groom-nywa abatsha ukubana bangene. Kugcizelela uTshuma
Kodwa uMnu. Msongelwa Ndlovu, eyinye njalo ingcwethi ecubungula ezombusazwe uthi i-Politburo le ikhipha obala ukubana akulanguquko phakathi kombuso kamuyi uMnu. Robert Mugabe lokaMnangagwa. Uthi ngphandle kokubuysela labo ababesekhwapheni likaMugabe, laye usesenza khonokho okwasuselwa uMugabe esikhundleni; ukufaka unkosikazi wakhe ku-Politburo.
"Lamagama akhanya esengene ku-Politburo ye-ZANU-PF, abonisa nje isisanasana, umtshado wenja. Abantu abayibo abangene ku-Politburo yibo abantu abakade besebenza lo-Mugabe, bebulala ilizwe. Nanku e abayibiza i-second Republic isibuye yabacela njalo ukuthi bakapule, bebulala, bediliza ilizwe. Akula mbono kumbe ngqondo ezintsha ezivezwa lapha. Kutshengisela ukuphelelwa okukhulu." Kutsho uNdlovu
Isisekelo sebandla le-ZANU-PF, sithi umkhokheli webandla ulamandla okukhipha nguloba ngubani kukhomithi ye-Politburo lapho afuna khona, kodwa bonke laba bazahlala ezikhundleni zabo kuze kube lomunye umhlangano omkhulu owe-Khongolosi ngemva kweminyaka emihlanu.